Jowai, Nohprah 10
U District Magistrate jong ka West Jaiñtia Hills ula pyntip ba ka don ka jingkhaïi bad jingshalan tuh ïa ki dohkha kiba la wanrah napoh Bangladesh shapoh ka District bad kane ka buh jingma khamtam lada wanrah da ki jait dohkha kiba don jingpang ne kiba la khang pyrshah.
Kum kane ka jingshalan bad jingpynrung be-aiñ ïa ki dohkha khlem da peit bniah, bad khlem da pynshisha ïa kine ki dohkha ba wan nabar ri ka buh jingma kaba khraw ïa ka koit ka khiah bad ka ktah jur ïa ka jingshngaiñ jong ki jingthaw ba im ha ka um, bad ka wanrah ïa ka jingduhnong ha ka liang ka ïoh ka kot ïa ki nongkhaïi dohkha kiba ïaid katkum ka hok bad ïa ka Sorkar Jylla.
Kumta na ka liang u District Magistrate jong ka West Jaiñtia Hills haba pyndonkam ïa ka bor katkum ka kyndon 163 BNSS ula khang pyrshah ïa ka jingshalan be-aiñ ïa ki dohkha na Bangladesh hapoh ka District baroh kawei. Kino-kino kiba leh pyrshah, yn pynshitom katkum ki kyndon aiñ.
