Ampati, Nohprah 10
Namar ka jinglong-jingman jong ka saiñ pyrthei ha Bangladesh, ka Deputy Commissioner (DC) ka South West Garo Hills (SWGH), ka Hema Nayak, ka la pynjari da ka korphiw miet naduh hynnin ka sngi, ka 9 tarik u Nohprah ban ïakhun pyrshah ïa ki kam kiba lah ban mih kum ka jingwan rung kyrthep bad kiwei-kiwei ki kam be-aiñ ha shi lynter khappud ka India-Bangladesh.
Lyngba ka hukum hynnin ka sngi, ïa kane ka rai katkum ka DC la shim da kaba buh jingmut haba ïadei bad ka jingkylla ba dang shen ha ka synshar-khadar ha Bangladesh.
“La khmih lynti ba ka jinglong-jingman jong ka jingshong shngaiñ ha khappud India-Bangladesh ka lah ban kylla ha ka por ban wan; bad haba peit ïa ka jinglong-jingman mynta ha ka ri, ka lah ban don ka jingleit-jingwan ba khlem jingbit na shiliang sha shiliang da ki briew kiba lah ban buh jingma, kynthup ïa ki dkhot jong ki kynhun lehnoh, ki nongkhaïi be-aiñ bad kiwei kiba don bynta ha ki kam be-aiñ ha shi lynter khappud ka India-Bangladesh,” ong ka hukum.
Ka hukum ka la bynrap shuh-shuh ba ka thaiñ khappud ha SWGH ka long kaba don jingma ïoh don ka jingwan buhai shnong be-aiñ bad ki kynhun runar kiba don jingïadei bad ki kynhun pyrshah ri, kynthup ïa ki kynhun lehnoh, kiba lah ban ïalum paidbah hajan u pud u sam bar-ri ha ka por mynmiet ban ïaid shakhmat bad ïa ki kam be-aiñ jong ki.
“Ban khanglad ïa kum kine ki kam be-aiñ bad ki kam kiba lah ban buh jingma bad ban pynneh-pynsah ïa ka shongsuk shongsaiñ hapoh ka distrik, ka Jylla, bad ka Ri hi baroh kawei, nga pyndonkam ïa ka bor ba la ai ha nga katkum ka Section 163 jong ka BNSS, ban pynjari ïa ka korphiw naduh ka por 08:00 mynmiet haduh ka por 06:00 baje mynstep hapoh 200 mitar na u ‘Zero Line’ (International Border),” ong ka hukum.
Ka DC ka la pynpaw ba kane ka hukum kan khanglad ïa ka ïaid ka ïeng ki briew hajan khappud bar-ri da ka jingthmu ban jam sha shiliang Bangladesh lane ban rung be-aiñ sha India.
Ka khang pyrshah ruh ïa ki jingïaid proseshon ba khlem jingbit ne ki jingïalang be-aiñ jong 5 ne palat ngut bad ban rah ïa ki tiar pynmynsaw ne kino-kino ki tiar kiba lah ban pyndonkam kum ki tiar pynmynsaw, kynthup ïa ki dieng bad ki maw, hapoh bad sawdong ka thaiñ khappud India-Bangladesh.
La khang pyrshah shuh-shuh ïa ki kam be-aiñ bad kiba lah ban buh jingma, ka jingkhaïi tuh ïa ki masi, ki mar ba la khang pyrshah, kwai, tympew bad kiwei-kiwei ki mar.
Kane ka hukum kan treikam mardor bad kan dang treikam haduh ban da pynmih da kiwei pat ki hukum.
