Shillong, Nohprah 10
Ka Khasi Students Union (KSU) West Jaiñtia Hills District ka la pynpaw ïa ka jingpyrshah jur halor ka jingshim rai jong ka NFR ban pynpoi ïa ka lynti rel shaduh sor Jowai.
Haba kren sha ki lad pathai khubor ha ka sngi Balang, u Bah Laitphar Syngkrem, President u la ong ba kum ka seng hi kan nym pdiang ïa ka jingthmu ban pynpoi ïa ka lynti rel ha sor Jowai.
Haba kylli, u ong, “Ka jingpyrshah jong ka seng ka long ka jingïohi shai kdar ba ka jingwan rung kyrthep ki briew ba nabar kaba la jyllei bha ha ki thaiñ Jaiñtia”.
“Ngi shah ban beiñ bad shah iuhroit ha kine ki briew kiba shu wan buhai shnong bad lada wan poi sa ka lynti rel ki briew ba nabar ri bad na bar jylla kin sa knieh lut ïa ki kam ki jam,” u la ong.
U Bah Laitphar u la kyntu ïa ka Sorkar ban wanrah noh ïa ki aiñ jingdawa kumba ka seng ka la dep dawa ha ki snem ba la dep.
Nalor kata, u la ong ruh ba balei ka Sorkar ka kynshoit ban wanrah lynti rel hynrei ki aiñ ïada ïa ka Jylla kiba la dep ban dawa ki buhrieh pynban. “Ka KSU kan nym shah ïa ka Sorkar ban leh katba mon ban wanrah ïa ka lynti rel bad ngin pyrshah halor kane ka jingthmu pynpoi ïa ka lynti rel,” u la ong.
“Wat ïalehkai bad wat kheiñ poh ïa ka jaitbynriew jong ngi ïoh ba kan sa poi thma ha Jaiñtia baroh kawei,” la bynrap shuh u Bah Laitphar.
U la ong ba lada ka Sorkar ka ïaid shakhmat halor kane ka kam, ka seng kam banse ban ïada ïa ka ri bad ka jaitbynriew ban shim da kano-kano ka lynti ruh.
