Nongpoh, Nohprah 10
Ka Dorbar Shnong Bhoirymbong Lumsohpieng ha ryngkat ka jingïatreilang bad ki dkhot ka Village Defence Party (VDP) ha ka jingkhynra kaba la pynlong ha ka step sngi Balang, ka la ïoh ban kem ïa lai ngut ki rangbah ryngkat bad ka kyiad pyrsi kaba don kumba 60 litar eiei na kawei ka jaka kaba don harud jong ka surok ban leit sha ka shnong Mynsain.
Katkum ka tyllong khubor la ïathuh ba kitei ki lai ngut ki rangbah kila don ha katei ka jaka naduh ka janmiet sngi Ba-ar tad haduh kane ka step ba ki nongïalam shnong ryngkat ki dkhot ka VDP ki la leit ban khynra bad ïoh syndon ban kurup ïa ka kyiad kaba la buhrieh ha ki jaka ba kham long khlaw.
Hadien ka jingkem ïa kitei ki lai ngut ki rangbah ryngkat bad ka kyiad, ki nongïalam shnong ki la leit ban aiti noh sha ki pulit ka Khapmara PIC na ka bynta ban leh ïa kaba donkam katkum ki kyndon aiñ.
Na ka liang u Rangbah Shnong ka Bhoirymbong Lumsohpieng, u Bah Hamjngai Hinge u la ïathuh ba ka shnong hi na ka por sha ka por, ka ju mana ban die kyiad beaiñ hapoh u pud u sam jong ka shnong naba ka wanrah ïa ka jingjot ïa ki nongshong shnong hi baroh.
U la ong ruh ba na ka liang ka shnong kan nym ailad ïa kum kine ki jait kam bad kan dang ïai bteng ban kem bad aiti sha kiba dei khmih, lada dang lap nangne shakhmat bad kyntu ruh ïa ki shnong ba marjan ba kim dei satia ban ailad ïa ka jingdie kyiad beaiñ hapoh ki shnong ki thaw ki jong ki.
