Shillong, Nohprah 10
U Samla Manbhalang Phankon u ba dei u nongwad RTI napoh ka Jylla ha ka 10 tarik u Nohprah 2025 u la sei madan lyngba ka jingwad jingtip RTI kaba u la ïoh ha kaba ïadei bad ka bai lut baisep ki nongrep kwai ka Jylla kiba la shah ktah ha ka khlam Budrot.
Ïa kane ka RTI une u samla u la pan na ka ophis jong ka Directorate of Horticulture ka Jylla bad hadien ba u la ïoh ïa ka jubab u la lap ba ka Sorkar kam pat shym la siew ïa ka bai lutksan sha ki nongrep kiba la shah ktah na ka khlam Budrot kaba dei ka khlam kaba ktah ïa ki kwai .
U la ïathuh da kaba pynshong nongrim lyngba ka RTI ba ki nongrep kiba la shah ktah ki kynthup na 8 tylli ki district ha ka Jylla, ha kaba baroh ki don haduh 8875 ngut ki nongrep kiba la shah ktah ha kane ka khlam bad ka jaka kaba la shah ktah bha ha kane ka khlam ka dei ha West Garo Hills District ha kaba na ka 40,100 ngut ki nongrep, ki don haduh 4,500 ngut kiba la shah ktah na kane ka jingpang Budrot.
Une u samla ula pynkynmaw ba ha ka por ba uwei na ki nongmihkhmat (MLA) na Garo Hills u la buh jingkylli hapoh Ïingdorbar Thawaiñ ïa kane ka mat kaba dei ka mat jong ka jingshah ktah ki nongrep kwai ha ka Jylla, ka myntri ka rep ka riang ha kato ka por ka Kong Ampareen Lyngdoh ka la ong ba la dep mang kumba 6.8 klur tyngka na ka bynta ban siew bai lutksan sha ki nongrep kwai kiba shah ktah ha kane ka khlam. Shuh shuh une u samla ula ong ruh ba katkum ka RTI kaba u la ïoh kam shym don kano-kano ka jingai bai lutksan sha kine ki nongrep ba la shah ktah ha kane ka khlam.
U la bynrap da kaba ong tang ha West Garo Hills ka bailut ksan kaba la ai sha ki nongrep ka long 2 klur 63 lak 37 hajar 5 spah tyngka hynrei katkum ki jubab lyngba ka RTI kaba u la ïoh kam shym la don kano-kano ka jingai bai lutksan sha ki nongrep.
U la ong ba kane ka pyni ba ka Sorkar MDA hapoh ka jingïalam ka NPP ka la jler bad thok ïa ki paidbah.
“Kane ka pyni ba ka Sorkar MDA hapoh ka jingïalam ka NPP ka la jler ka la thok bad ka la shukor ïa u paidbah khamtam ïa kine ki nongrep bapli kiba la shah ktah ha kane ka khlam, ” u la ong. Na ka liang jong u kum u nongwad RTI u la ong ba ai ba u paidbah hi un rai bad un bishar ïa ki kam ba kane ka sorkar MDA hapoh ka jingïalam ka NPP ka la leh.
