London, Nohprah:
Katei ka nongialam saiñpyrthei jong ka seng Labour Party na ka thaiñ Sepngi jong ka London, ka la shah daiñ haduh 40,000 Pound hadien ba ka la rem ha ka jing shah ujor pyrshah ïa ka jingleh pynkheiñ aiñ jongka, halor ka jingthung be-aiñ ïa kawei ka samla pule na India kum ka nongri khun ha ka iingsah jongka.
La lap ba ka Hina Mir, kaba dei ka Councillor bad ka nongiasaid aiñ, kaba 22 snem ka rta, ka la thung ia ka Himanshi Gongley, kaba 22 snem ka rta, na ka bynta ka pisa kaba 1,200 pound ha ka shi bnai watla kam don ia ka hok treikam katkum ka aiñ ha UK, ong ka khubor na ka ïingbishar sha ki nongthoh khubor.
Ka nongsynshar barim jong ka nongbah Hounslow, kaba 45 snem ka rta, ka la buh ia katei ka samla pule na India, ban pyntrei baroh 24 kynta shi sngi, haduh hynriew sngi lynter baroh shi taïew ban ri bad sumar ia ki arngut ki khun jong ka bad ia kine la phla hakhmat ka iingbishar jong ka nongbah London, dang shen.
“Ka councillor Mir ka dei ka briew kaba don ka jinglong kaba long ka nuksa. Ka dei ka nongiasaid aiñ, ka councillor bad ka don ka bynta ba kongsan ha ka imlang- sahlang,” ka kaiphod jong ka ïingbishar ka sot ia ka jingkren jong u nongbishar Stephen Hellman.
Katkum ka khubor, la ong ba ka Mir ka la ai kyrteng thok ia katei ka samla pule da ka ‘Ria’ bad ka la kam ba ka dei ka nongwan jngohkai pyrthei kaba ju wan sha iing jongka ban lehkai ‘video game’, ban peit TV bad ban pynjahthait bad ban leh ia ki kam iing kam sem kumba ju ialeh lang haba iashong- iasah lang ha kajuh ka iing.
Hynrei ka ophis treikam jong ka UK ka la ïathuh ha ka ïingbishar ba la iohi ia ka dur ba i-shitom jingmut ha katei ka samla pule ha ka por ba ka leit ban pynsangeh ïa ka kali pulit ban pan jingïarap ha u bnai Nailar jong u snem ba la dep, ha kaba kane ka jingjia kan sa paw pyrthei noh syndon. Nalor kata pat, la shem ba katei ka khynnah ka la shu shong be-aiñ hapoh katei ka ri wat hadien ba ka Visa jongka, ka la sangeh treikam ia ka por ba la buh, kaba long ha u bnai Lber jong u snem 2023 bad ka la phla hakhmat ka ïingbishar ba ka la shah lehbeiñ bad shah pynshitom beiñ haduh ba kam kwah shuh wat tang ban im ruh.
Hadien ba ka la shah rem ha ka jingujor pyrshah ïa ka rai jong ka immigration ha u bnai Kyllalyngkot, ka Mir kan hap ban siew ïa ka kuna kaba haduh 40,000 Pound bad kumjuh ruh ia ka 3,620 Pound na ka bynta ki bai lut- bai sep jong ka ïingbishar.
Ha kajuh ka por, ki nongmihkhmat jong ka seng Pyrshah na ka Hounslow Council jongka, ki la dawa ia ka, ba ka dei ban iehnoh ia ka kam jongka, kum ka nongsynshar.
