Shillong, Nohprah 10
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi biang na ki jingshah prong tuh jong ki ïing bad ka jingshah tuh jong ki ar shaka na kylleng ki jaka ka nongbah Shillong.
Katkum ka khubor na ka website jong ki pulit la ong ba u Raj Kumar Rasaily u la ai ka jingujor ba ha ka step jong ka 7 tarik mynta u bnai, ki runar bym lah ban ithuh ki la prong tuh hapoh ka ïing sah ka jong u, kaba don ha Upper Mawprem, Shillong bad ban rah tuh ïa ka ksiar kaba shongdor kumba T.4 lak. Ha kawei pat ka khubor, u Pritiraj Paul u la ai ka jingujor ba ha ka 8 tarik mynta u bnai, ha ka por kumba 2 baje mynsngi, kawei ka arshaka kaba dei jong u mama jong u, u Sandip Paul, kaba don ïa u registration number ML05-K-9725 la lap ba ka la jah rngai na ka jaka ba pynïeng ha ka thaiñ Jail Road, Shillong.
Ha kawei pat ka khubor, ka Chaina Ghosh ka la ai ka jingujor ba ha ka 5 tarik mynta u bnai, ha ka por dang 3 baje mynstep, lai ngut ki briew bym lah ban ithuh kiba la kah dur khmat, ki la prong jubor hapoh ka ïing jong ka kaba don ha Shantipara ha West Garo Hills bad ha kaba ki la thombor ïa ka kmie jong ka, kaba la 78 snem bad hadien kata ban lute ïa ka ksiar ka rupa bad ka pisa kaba long T.3.5 lak.
