Shillong, Nohprah 11
Ka Meghalaya ka la bam por tang kumba 90 minit ba kan lah ba kan pynliem ïa ka Nagaland da 109 ron ha ka lympung ïalehkai jong ka U-19 Men’s Cooch Behar Trophy 2025-26 plate group, kaba la kut noh hynne ka sngi, kaba dei artad ka sngi kaba saw bad kaba khatduh jong kane ka jingïakhun ba la long ha madan ïalehkai ka MCA, Polo.
Haba wan ban bteng na ka 208/6 ban pyrshang kynjoh ïa ka thong ka 375 ron ban jop, ka Nagaland ka la lap ba hap lut noh ki wiket ba sah ki jong ka hadien ba ka la lah ba kan kamai tang 265 ron, kaba hangne u kapten ka Meghalaya u Angkit Tamang u la lam khmat hi dalade ïa ka kynhun ban khur 5 wiket na ka bynta 45 ron.
Ki wiket ba sah ka Nagaland la ïoh ban khur lem pat ïa ki da u Mewankitbok Kharpuri (2/71), Apandanka Marak (2/33) bad Gaurav Jyoti Thakuria (1/43).
Da kane ka jingjop, ka Meghalaya ka sah sa kawei ka jingïakhun kaban long pyrshah ïa ka Mizoram kaban sdang naduh ka 16 tarik mynta u bnai Nohprah kaban long ha Anand, Gujarat, hynrei ka jingjop kaba mynta ka sngi ïa ka Nagaland, ka la nang kham pynjan ïa ka sha ka thong ban jam sha ka phainal, hadien ba ka la ïoh ba kan khur 18 poiñ, bud pat sa ka Nagaland kaba don ha ka kyrdan kaba ar hadien ba ka la khur 19 poiñ, katba ka jylla kaba bat ïa ka kyrdan ba nyngkong ka dei ka Manipur, kaba la ïoh ban khur 24 poiñ.
U President ka MCA u Naba Bhatacharjee, u ai ïa ka jingïaroh bad pyrto ïa ka kynhun hadien ba kan jop ïa kane ka jingïakhun, ha ka juh ka por ba um lah ruh ban khlem da ïaroh kyrpang ruh ïa ki katto katne ki ‘rang ïalehkai kum ki jong u Angkit, Sameer Choudhury (6/40) Gaurav Narleng (127 ron) bad Mewankitbok Kharpuri (uba don ha ka kyrdan kaba lai napdeng ki ‘rang kawang bol ban khur bun tylli ki wiket, katta 24).
U Naba u ñiew bad shim ba kane ka jingjop ka kynhun ka dei namar ka jinglah ban ïalehkai bha da ka kynhun baroh kawei, kaba wanrah ruh ïa ka jingkyrmen ïa ka Jylla ba kan nang ïai kiew shuh-shuh ha ki sngi ki snem ban wan.
