Shillong, Nohprah 11
Ka Germany ka la khur ïa ka nam lahduh ha ka sien kaba phra ha ka lympung ïalehkai FIH Hockey Men’s Junior World Cup Tamil Nadu 2025, hadien ba ka la pynliem ha ka sien kaba nyngkong ïa ka Spain lyngba ka tie-breaker da 3-2 ha ka miet jong ka sngi Balang.
Kane ka jingïakhun ka la long kaba itynnad bad kaba ïakhaid bha. Ha ka jingshisha ka Spain ka la dei ban thep kol ha ka tie-breaker, hynrei u nongapkol ka Germany u Jasper Ditzer u la lah ban khanglad na ka jingshah thep bad ban pynlong ïa ka kynhun ban khur syndon ïa ka jingjop.
Ha kane ka jingïakhun kine ki kynhun ki la ïakhaid mar 1-1. Ka Germany ka la pynkhih jar nyngkong eh lyngba u Justus Warweg ha ka minit kaba 26, hynrei hadien shiteng kynta ka Spain ka la lah ban pynïakhaid kylla lyngba u Nicolas Mustaros ha ka minit kaba 33.
Ym shym la don eiei ban pynïakhlad ïa ki ar tylli ki kynhun. Katei ka kynhun kaba la bat ïa ka nam lahduh kaba phra sien, ka la lah ban pyni ïa ka jingkhlaiñ bor bad ka jingtbit ban ym ailad ïa ka Spain. Ka Germany ka la ïaid shakhmat ban ïada ïa ki penalty corner ha ka kylla step, watla ka liang pyrshah ka la pyrshang ban thep kol bad kane ka la ïai neh haduh kaba kut ka jingïalehkai.
Haba phai sha ka jingïaknieh ïa ka kyrdan balai kaba la long kham hashwa, ka India ka la pynliem noh ïa ka Argentina da 4-2 kol na ka bynta ban khur ïa ka takma rnong.
Ka India, kaba la rah ïa ka nam lahduh ha u snem 2016 ha Lucknow, ka la duh noh ïa katei ka nam ha ki ar tylli ki lympung ba la dep, ha kaba ka la wan ha ka kyrdan kaba saw ha Bhubaneswar ha u snem 2021 bad sa shisien pat hadien ar snem ha Kuala Lumpur.
Watla ka Argentina ka la lah ban ïalehkai naduh kaba sdang ha kaba ka la ïoh ban pynkhih jar lyngba u Nicolas Rodriguez ha ka minit kaba 3 bad u Santiago Fernandez (44). Hynrei ha kane ka jingïakhun, ka India ka la lah ban pynpaw ïa ka jingtbit ban pynphai kylla lyngba u Ankit Pal ha ka minit kaba 49, kumjuh u Manmeet Singh (52) bad u Anmol Ekka (58) lyngba ki penalty corner, katba u Sharda Nand Tiwari u la thep lyngba ka penalty stroke ha ka minit kaba 57.
Ka kabu kaba nyngkong jong ka Argentina ka la wan ha ka minit kaba lai da ka penalty hadien ka jingbakla jong u Anmol Ekka, bad u Rodriguez um shym la pynlehnohei ïa kane ka kabu ksiar, da kaba pynlong ïa ka kynhun jong u ban lamkhmat.
Watla ka India ka la ïoh ïa ki kabu kiba biang hapoh ki 15 minit, hynrei ka la shah khanglad noh ha ka liang pyrshah. Ka kabu kaba biang bha jong ka India ka la wan ha ka minit kaba 20, hynrei ïa ka bol ba la shut da u Dilraj Singh la shah khanglad noh ha u nongapkol ka Argentina u Joaquin Ruiz.
Ka India ka la sdang ïa ka kylla miet da ka jingkhlaiñ bor, ha kaba ka la ïoh saw tylli ki penalty corner ha ka minit kaba 31, hynrei kam shym la lah ban pynphai, ha kaba u Anmol Ekka u la pyndei ïa ka bol na diengkol.
Ka Argentina ka la bteng ban ïakhun tyngeh ban pynpra ïa ka bynta kaba shadien jong ka India, ha kaba ka la ïoh ïa ka penalty corner kaba nyngkong ha ka minit kaba 37, hynrei u nongapkol ka India u Princedeep Singh u la lah ban ïada na ka jingshah thep.
Ka Argentina ka la ïoh sa ar tylli ki penalty corner ha ka minit kaba 40, hynrei kam shym la lah ban thep na ka jingshan tyngeh jong ka India.
Ha ka penalty corner kaba saw jong ka Argentina ka la wan ha ka minit kaba 41, ha kaba ka bol jong u Rodriguez kam shym la rung.
Ka India ka la pynneh ïa ka jingkut jingmut jong ka bad ka la lah ban pynphai kylla haduh lai kol ha ka kylla miet lyngba ki ar tylli ki penalty corner bad kawei ka penalty stroke.
