Shillong, Nohprah 11
Ka vice-captain ka kynhun ïalehkai kriket ka India, ka Smriti Man-dhana ka la wanphai biang sha ka jingkilanmet, hadien ba la pynbna ïa ka jingpynsangeh noh na ka bynta ka jingïathoh shongkurim jong ka bad u nongthaw jingrwai, u Palash Muchhal.
Ïa kane ka ‘thei ïalehkai la ïohi ba ka la kilanmet ha kawei ka jaka ïalehkai shimet na ka bynta ban pynkhreh ïalade ïa ki lympung ïalehkai ki ban wan.
U hynmen jong ka, u Shravan Mandhana, ula sam ïa ka dur jong ka ha ka Instagram, kaba pyni ba ka Smriti, kaba riam ïalade ha ryngkat ka sopti ïalehkai kriket.
Ka Smriti, kaba la lah ban ïalehkai bha halor ka jingjop ka India ïa ka Women’s World Cup 2025, ka la khmih lynti ban wanphai biang sha ka jingïalehkai kriket na ka bynta ki san tylli ki jingïakhun T20I series pyrshah ïa ka Sri Lanka. Ïa kane ka series yn ïalehkai naduh ka 21 haduh ka 30 tarik mynta u bnai ha Visakhapatnam bad ha Thiruvananthapuram.
Kine ki jingïakhun kin long kum ka jingpynkhreh na ka bynta ka T20 World Cup ka ban sa long ha u snem ban wan. Ka Smriti kan long ruh ka kapten jong ka Royal Challengers Benga -luru ha ka Women’s Pre-mier League, ka ban sdang ha ka 9 tarik u Kyllalyngkot ha Navi Mumbai.
Haba pynpaw ha ka Instagram halor ka jing-sangeh ïathoh shongkurim, ka Mandhana ka la thoh: “Nga donkam ban pynshai ba la pynsangeh noh ïa ka jingïathoh shongkurim.”
Te kumta ka kyntu ïa ka jinglong kyrpang na ka bynta baroh ar tylli ki longïing bad ka la pynksan ïa ka jingbteng jong ka ïa ka jingïalehkai kriket, da kaba pynpaw ban mihkhmat ïa ka India ka dang long ka jingthmu ba kongsan tam ha ka kam ïalehkai jong ka.
U Palash Muchhal, u la pynmih ruh ïa ka jingpynbna paidbah, da kaba thoh ba u la rai ban ” ïaid shakhmat” na katei ka jingïadei, da kaba batai ïa katei ka por, kum kawei na ki por ba eh tam ha ka jingim jong u.
U Muchhal u la ujor pyrshah ïa ki “khubor bym don nongrim” kiba la saphriang shaphang ka jingïadei jong ki bad u la maham ban ujor sha ka aiñ pyrshah ïa ki nongpynphriang ïa ki jingthoh kiba lamler ne kiba pynjah burom.
Ha ka jingshisha nyngkong la thmu ban pynlong ïa kane ka jingïathoh shongkurim ha ka 23 tarik u Naiwieng ha Sangli, Maharashtra, hynrei la pynsangeh noh namar ka jingdon ki jingeh ha ka koit ka khiah. U kpa jong ka Mandhana u la shah sumar ha hospital namar ka jingpang klongsnam ha ka step sngi kyntiew kurim, bad ki khubor ki ïathuh ba u Muchhal ruh u la shah sumar hapoh hospital.
Ka jingpynkynriah ha kaba sdang ka la pynmih jingkyrmen ban pynbeit biang ïa ka sngi, hynrei ym pat shym la pynbna ïa ka tarik kaba thymmai. Baroh arliang mamla ki la sdang ban weng noh shwa ïa ki jingthoh na social media.
