Shillong, Nohprah 11
Ka Young Men’s Christian Association (YMCA) Shillong ha ka sngi Balang ka la pynlong ïa ka jingrakhe “Advance Christmas” ha Bharat Scouts and Guides Hall.
Ha kane ka jingrakhe la ïadonlang u Bah J.R Myrboh General Secretary YMCA Shillong, u Rev. R.Marshall Lyngdoh uba long u Board of Directors jong ka YMCA, ka Medarisha Thongni, Philistarwell Mawkon, ki Board Members, ki nongtrei, ki khynnah bad ka ïing ka sem jong u Bah Shamir J Thabah.
U Rev. R.Marshall Lyngdoh, u la ai khubor Khristmas ha kaba u la pynkynmaw ïa ka jingmut jong ka Khristmas, ba kam dei shaphang ki jingpynitynnad (decorations), ki jingpynthaba (lights) lane ka jingot ‘cake’ hynrei ka Khristmas ka dei ka sngi ba la kha ïa u Jisu Khrist bad ka dei ruh ka jingpyndep ïa ka jingkular jong u Blei.
Shuh-shuh u la pynkymaw ruh ba ka Khristmas ka dei ïa baroh ban ïasam ïa ka khubor babha ka jingkha ïa u khun u Blei uba long u nongpynim jong ka pyrthei u Jisu Khrist bad kyntu ba dei ban ailad ïa u Jisu Khrist ba un long u pdeng jong ka jingim.
La pynphuh pynphieng ïa ka jingrakhe da ki jingrwai jingshad Khristmas na ki khynnah jong ka YMCA Computer Education Centre, kumjuh la sam khusnam bad ki syrnod sha ki khynnah ba la pyndep ïa ki kyrdan pule DCA, TALLY bad DEO.
