Shillong, Nohprah 11
Ka shnong Lapalang kaba don ha ka thaiñ Riwar bad hap hapoh ka Pynursla Konstitwensi, ha ka sngi Palei ka la ïoh ban plie paidbah ïa ka jaka jngohkai kaba thymmai kata ka Wah Rymben.
Kane ka wah ka long shisha ka wah kaba itynnad bad kaba dap da ki mawsiang kiba heh baheh hapdeng ka wah, kaba lada peit na jngai la i thik kum ka madan, kaba pynshoh biej shi katdei eh. Ym tang ba ka long ka wah kaba itynnad bad kaba khuid, hynrei kawei pat ka bynta kaba pynshoh biej ka dei ka jingpynkylla ‘fish sanctuary’ ïa ka bynta hapdeng jingkieng ban jam na shiliang sha shiliang, ha kaba lah ban ïohi ïa ki dohkha kiba bun jait.
Ka shnong Lapalang ka jngai kumba 30 km eiei na Pynursla bad haba la poi ha ka shnong Lapalang, ban poi pat sha kane ka wah, hap ban hiar ïa ki mawkyndon kiba la dep ban shna bha bad itynnad. Hapdeng jong ka wah, la dep ban tei ïa ka jingkieng, ha kaba ki nongleit kai, ki lah ban ïeng napdeng jingkieng bad sakhi ïa ka jingitynnad jong ka wah bad ki mawsiang kiba don halor jong ka. Nalor kane, kiwei ki jingpynbyrngia ki long kum ka jingshong lieng ne ban sah miet ruh ha ki tent kiba la pynkhreh ba la buh halor ki mawsiang.
Ïa kane ka jaka jngohkai kaba thymmai ha shnong Lapalang, la plie paidbah da u Symbud Myntri Rangbah ka Jylla u Bah Prestone Tynsong uba long ruh u MLA ka thaiñ ha ryngkat ka jingïadon lang jong ka MDC ka thaiñ ka Kong Grace Mary Kharpuri, u SE ka tnat Tourism, ka SDO Civil ka Pynursla Sub-Division Kong EL Warjri lem bad kiwei kiwei ki ophisar Sorkar, ki nongïalam shnong bad ki nongshong shnong.
Ha shwa ban plie paidbah ïa kane ka jaka jngohkai, haba ai jingkren kum u kongsan ha ka jingïalang kaba la pynlong ha madan phutbol ka shnong Lapalang, u Bah Prestone u la pynpaw ïa ka jingkmen ban ïadon bynta lang ha kum kane ka sngi khraw jong ka shnong.
“Ka wah Rymben ka long kawei na ki wah kaba paw nam tam ha ka thaiñ Riwar bad nga sngew sarong ryngkat ka Kong Grace kum ki nongmihkhmat ka thaiñ ba ha kane ka thaiñ jong ngi, ngi don ïa ka shnong kaba khuid tam, ka um kaba sngur tam bad mynta yn ïoh sa ïa ka wah kaba khuid tam,” la ong u Bah Prestone.
“Ngi sakhi ba ka shnong Lapalang ka long ka shnong kaba khuid bad kaba itynnad, kumta donkam ban nang pynkhuid shuh shuh khnang ba ki nongwan jngohkai kin ïai tuid sha kane ka shnong. Hynrei kan long lehnohei ban shu kren bad kyntu lada ki nongshong shnong kim ïatreilang ne shim ka jingkitkhlieh ban rah ïa ka nam ka burom ka shnong,” u la ong.
“Ki nongjngohkai ki long ka jingkyrkhu ha ka ban kyntiew ïa ka ïoh ka kot ki shnong ki thaw kumta ngam kwah ban ïoh sngew ba ki ‘tourist’ ki shah shoh, shah thap lada wan rung hapoh ka shnong bad kum ka Sorkar ruh kan sngewsih lada jia kumta,” la ong u Bah Prestone bad bynrap ba kum ki nongshong shnong ki dei ban long kiba jynsur mynsiem bad kiba ïapariah bad ki nongwan jngohkai naba kine kin pynlong ïa ki nongjngohkai ban kynmaw sah ïa ka shnong Lapalang bad ka thaiñ Riwar baroh kawei.
U Bah Prestone u la kyntu ruh ïa ki nongshong ban shim ïa ka skhim ban shna ïa ki homestay kaba ïoh haduh 30% kum ka ram bad 70% kaba ai da ka Sorkar khnang ba kan kylla long kum ka lad ban kamai jakpoh kaba shirta.
