Shillong, Nohprah 11
U Member Secretary ka Meghalaya State Pollution Control Board (MSPCB) u Dr. GH Chyrmang u la pynthikna ba ka ‘Public Hearing’ na ka bynta ka Shree Cement Integrated Cement Plant ha Daistong, East Jaiñtia Hills kan ïaid beit kumba la buh tarik ha ka 19 tarik Nohprah 2025.
Haba kren sha ki lad pathai khubor u Dr. GH Chyrmang u la ong ba borabor ïa ki ‘Public Hearing’ la pynlong katkum ki kyndon jong ka Environment Impact Assessment (EIA) 2006.
U Dr. Chyrmang u la ong ba hashuwa ban pynbeit ïa ki tarik ban pynlong Public Hearing, ka MSPCB ka donkam ban ïoh ïa ki Term of Reference (ToR) bad hadien ba la ïoh ïa ki ToR ka dei ka kamram jong ka Board ban pynlong ïa ka ‘Public Hearing’.
Shuh-shuh u la ong ba ka MSPCB kam don bynta eiei haba ïadei ka jingpyrshah ki nongshong shnong ïa ka ‘Public Hearing’ namar ïa ka ‘Public Hearing’ yn pynlong ha ka jingïatreilang bad ki bor District. U la ong ba ka MSPCB ka lah ban pynsangeh treikam ïa ka ToR lane ban pynlong ‘Public Hearing’ tang lada wan hukum na ïingbishar.
U la ong ba um don ban ong eiei halor ka jingdawa ki nongshong shnong ban pynsangeh ïa ka ‘Public Hearing’ namar ka MSPCB ka don bynta tang ban khmih halor ka jingdonkam jong ka EIA bad kin ïaid skhmat ban pynlong ïa ka ‘Public Hearing’.
