Shillong, Nohprah 11
Ka Assam Rifles ka la pynbna ïa ka bynta kaba 5 jong ka lympung ïalehkai Half-Marathon jong ka, kaban long ha nongbah Shillong ha ka Sngi U Blei, 14 tarik u Nohprah 2025. Kane kadei ka lympung mareh kaba heh tam jong ka thaiñ Shatei Lam Mihngi. Ka bynta jong kane ka lympung ha u snem 2025 la khmih lynti ban don ka jingïashim bynta kaba heh bha namar ka jingpawnam jong kane ka jingïakhun kaba nangkiew ha ka thaiñ Shatei Lammihngi bad ha kylleng ka Ri.
La khmih lynti ba ha kane ka Assam Rifles Half Marathon (ARHM) Shillong yn sa wan ïashim bynta da ki katto katne ki kynrem ki lyndan na ka Sorkar, ki Kynhun Shipai bad ki bynta bapher bapher jong ka imlang sahlang. Kane ka lympung kadei kaba dang paw shuh-shuh katba dang ïaid ki snem. Ha kane ka lympung, lah ban don palat 3000 ngut ki nongmareh ki ban ïakhun ha ki lai tylli ki kyrdan ïa mareh bapher-bapher-5km, 10km bad 21km-naduh ka rta kaba 12 haduh 60 snem shaneng. Ki nongmareh na kylleng ka ri ym tang ba kin lah ban pyni ïa ka jingtbit ha ka lynti kaba itynnad tam jong ka Upper Shillong hynrei kin ïakhun ruh ban ïoh ïa ka khusnam kaba kot sha ka T.20 Lak.
Kane ka lympung ka la kylla long ka jingrakhe ïa ka jingïamareh kaba ki briew ki ap khmih lynti bha ha ka thaiñ Shatei Lammihngi bad la khmih lynti ba kan tam ïa baroh ki rekod ba ladep ha kaba ïadei bad ka jingïashim bynta. Ka Assam Rifles Half-Marathon ka thmu ban kyntiew ïa ka koit ka khiah bad ka jingïatylli ha ka thaiñ Shatei Lammihngi. Ka Assam Rifles ka pdiang sngewbha bad ai mynsiem ïa iwei pa iwei i briew jong ka ri ban ïashim bynta ha kane ka sngi.
Ka thong jong kane ka jingïakop mareh kam dei tang ban kyntiew ïa ka koit ka khiah bad ka jingïatreilang hapdeng ki shipai hynrei ban pynshlur ruh ïa ki paidbah ha ka jingïalang ban bud ïa ka jingthmu jong u Myntri Rangbahduh u Narendra Modi na ka bynta ka ri India kaba koit ba khiah
Ka Assam Rifies ka ai khublei ruh ïa ki nongkyrshan ïa kane ka jingïakhun kata ka Indian Oil Corporation Ltd. SBI, YES Bank, IDFC First Bank, TATA Advanced Systems bad ka ISL kaba pynïaid ïa kane ka lympung kaban sa long shen.
La khmih lynti ba ka jingïakop mareh kaba heh tam ha ka thain Shatei Lam Mihngi kan khring bun tam ki nongïashim bynta ha kaba ki khusnam ki kot sha ka T.20 lak.
