Shillong, Nohprah 12
Ka Manchester City ka la wanphai ban pynliem kylla ïa ka Real Madrid da 2-1 ha ka Santiago Bernabeu ha ka sngi Palei bad kane ka jingjop ka la pynshong synjur ïa ka lawei jong u Xabi Alonso ba un nangïai sah hapoh kane ka kynhun ba khlaiñ bor na Spain.
Watla ka Madrid ka la ïoh ban pynkhih jar nyngkong eh, hynrei ka kynhun jong u Pep Guardiola ka la ïoh ïa ka kabu kaba biang eh ban khanglad ïa katei ka kynhun ba khlaiñ bor jong ka lympung Laliga ban ïakynduh ïa ka jingeh ha ka Champions League.
Ka Madrid, kaba la duh ïa u Kylian Mbappe, uba la mynsaw, ka la sdang ban ïalehkai bha ha kaba nyngkong ha kaba u Rodrygo Goes u la ïoh ban pynkhih jar ha ka minit kaba 28 bad kane ka long kaba nyngkong eh jong u na ki 33 tylli ki jingïakhun ba la lah. Une u rangïalehkai na Brazil u la lah ban thep kol lyngba ka jingïarap lang u Alvaro Carreras ha kaba u rangapkol ka City u Gianluigi Donnarumma um shym la lah ban khanglad na ka jingshah thep.
Kane ka shi kol u Rodrygo ka la pynkmen shipor ïa ka kynhun u Alonso, hynrei tang hadien shiteng kynta ka City ka la lah ban pynphai kylla hadien ba u Thibaut Courtois u la pynbuh bol na ka bynta u Josko Gvardiol uba la ïoh ban pyndei da ka khlieh bad ka la biang pura na ka bynta u Nico O’Reilly ban pynphai kylla ha ka minit kaba 35.
Hashwa ban kut ka jingïalehkai jong ka kylla step, ka City ka la pynbud biang sa shi kol hadien ba u Antonio Rudiger u la pynur ïa u Erling Haaland hapoh ‘box’, bad utei u khlur ïalehkai na Norway um shym la pynlehnohei ïa kane ka kabu ksiar bad ban pynlong ïa ka City ban tam da 2-1 kol haduh kaba kut ka jingïalehkai.
Watla ka Madrid ka la bteng ban ïakhun tyngeh na ka bynta ban pynïakhaid hynrei kam shym la lah ban pynurlong haduh kaba ar bad ka la mad ïa ka jingshah rem. U Courtois u la lah ban pyllait na ka jingshah thep ha ki jingpyrshang jong u Haaland, Rayan Cherki, bad u Jeremy Doku. U Alonso u la pynrung ïa u Endrick uba dang 19 snem ka rta, ha kaba une u rangïalehkai ba dangkhynnah u la ïoh ïa ka kabu kaba biang, hynrei um shym la lah ban pynurlong.
Ki lad pathai khubor jong ka Spain ki la pynpaw ba ka jingshah rem kan pynlong ïa u Alonso ban shah weng kam shi syndon na kane ka klob namar ka Madrid ka la jop tang ar sien na ki phra sien ïakhun bad mynta ka hiar sha ki kyrdan ba hynñiew ha ka Champions League league. Katba ka jingjop ka la pynlong ïa ka City ban kynjoh sha ka kyrdan basaw bad kamai 13 point na ki hynriew sien ïakhun.
