Shillong, Nohprah 12
Ha ka Sngi Thohdieng, ka NPP ha Nartiang Konstitwensi ka la nangïoh bor bad nang khlaiñ shuh-shuh hadien ba da ki hajar ngut ki nongïalam bad nongkyrshan na ka VPP bad Congress ki la pynïasoh sha ka seng ha ka jingïalang ba la pynlong ha Community Hall jong ka shnong Wahïajer.
Ïa ki nongïalam kiba don ym duna ïa ka 700 ngut lem bad ki hajar ngut ki nongkyrshan kiba dei jong ka VPP bad Congress, la pdiang burom sha ka NPP da u MLA jong ka National People’s Party (NPP) na Nartiang Constituency, Bah Sniawbhalang Dhar.
Ïa kine ki nongïalam bad ki nongkyrshan na ka Voice of the People’s Party (VPP) bad Congress na ki 73 tylli ki shnong kiba hap ha ka Nartiang Constituency, la pdiang sngewbha ha ka rukom kaba shongkun bha ha kaba la donlang ruh naduh ki MDC ka NPP, kynthup ïa u CEM ka JHADC, u Bah Thombor Shiwat, u MDC ka Wahiajer, u Bah Reformingson Lamare, u MDC ka Mynsngat Khanduli, u Bah Phein Nianglein, u MDC ka Moodymmai, u Bah Jesse Suiam bad ki nongkyrshan ka NPP. Na ka liang jong kine ki nongïalam kiba la wan pynïasoh bad ka NPP ki la ong ba kawei na ki daw ka dei halor ka rukom trei jong u MLA uba la lah ban wanrah bun ki kam pynroi bad pynkylla dur ïa ka Konstitwensi ha ki liang baroh. Haba kren ha ka jingïalang, u Bah Sniawbhalang u la ai khublei ïa kine nongïalam bad nongkyrshan kiba na ka VPP bad Congress kiba la wan ban pynïasoh noh ïalade bad ka NPP bad u la kular ba un trei shitom ban pynkhlaiñ ïa ka seng ha ka Ri-lum Jaiñtia bad ha ka Jylla baroh kawei.
“Tang katto-katne por hadien ka ilekshon MDC ki nongïalam na kine ki ‘party’ bapher-bapher ki la wan ban kyrpad bad pynsngew ha nga ba ki la kwah ban pynïasoh noh sha ka ‘party’ bad kam dei satia ba nga khot ïa ki. Ki paidbah ka Nartiang Constituency ki dei ki briew kiba la nang la stad, kiba leh ki kam ‘business’ kiba la biang ka pule-puthi bad kumta ki la tip bad ki la nang ban bishar ïa kaei kaba ka Sorkar ka leh na ka bynta ka roi ka par ha ka thaiñ bad ha ka Jylla baroh kawei,” ong u Bah Sniawbhalang. Shuh shuh u ong ruh ba ha ka jingwan jong ki sha ka NPP ki pynpaw beit tang kawei, kata ban trei na ka bynta ka seng bad pynkhlaiñ shuh-shuh ïa ka seng nangne shakhmat. U MLA u la ong ruh ba wat ïalade u khlem poi pyrkhat ba kin bun haduh katne-katne ki nongïalam na kiwei ki seng kiba kwah ban pynïasoh watla ka ilekshon MLA ka dang jngai sa kumba arsnem eiei.
Ha kane ka jingïalang, na ka liang u Bah Knierlang Siangshai, RS Umjaliasiaw uba ju don barabor bad ka VPP, u la ong ba ka seng VPP mar ïa jop ïa ka ilekshon MDC ha KHADC kam shym la don ïa ka jingsngew na ka bynta ka jaidbynriew hynrei ka la beh kam ïa ki nongtrei kiba dei na ka jaidbynriew.
“Nga dap da ka jingsngewsih bad kumta nga lah mih noh na ka seng VPP ban ïasoh noh bad ka NPP ban ïatreilang ban kyntiew ïa ka Constituency bad ïa ka Ri-lum Jaiñtia,” u la ong.
Ki la don ruh ki ‘riewrangbah na ka Congress kiba pynpaw ba watla kim don daw ïa ka seng kaba ki don baroh shi katta hynrei haba ki ïohi ïa ka rukom treikam jong u MLA bad ki kam pynroi ba u wanrah ha ka thaiñ, ka pynlong ïa ki ban kwah snohkti lang na ka bynta ban pynkhlaiñ shuh-shuh ïa ka roi ka par ha ka thaiñ da ka jingïatrei lang ryngkat-ryngkat.
