Shillong, Nohprah 12
Ka Voice of the People Party (VPP) Youth Wing ka la kynnoh ba u Chief Executive Officer (CEO) ka Tnad Shillong Municipal Board, kata u PK.Boro, u shu bam tang ka pisa da ki lak, hynrei um ju wan trei pat ha ophis.
Kane ka jingkynnoh ka la mih hadien ba ka VPP Youth Wing hapoh ka jingïalam u Bah Marbud Dkhar ka la leit ban ïakynduh ïa u Boro ha ophis ka Municipal hynrei um shym la don.
Haba kren sha ki lad pathai khubor u Bah Marbud Dkhar, President u la ïathuh ba ym dei tang mynta ba ki wan ban ïakynduh ïa u CEO hynrei man ka por ki ju wan, hynrei kim ju ïoh ban ïakynduh ban ïakren ïa ki mat kiba bun, namar ba u wan ophis tang teng-teng.
Ha ka jingïakren jong ka VPP bad ki nongpeit ha katei ka ophis treikam ki la ïathuh ba u CEO ka Municipal u wan ophis tang teng-teng namar ba u bat haduh 4 tylli ki kam. Haba ngi pan da ka ‘attendance’ jong u CEO ban tip ba katno sngi u wan ha ka shi taïew hynrei kim don, la ong u Bah Marbud.
Shuh shuh u la ong ba ka seng ka la ïoh ïa shibun ka jingujor na ki paidbah, ba u CEO ka Municipal um ju don ha ophis bad haba ki kwah ban ïakynduh ruh kim ju ïoh.
“Ngi pynrem jur ïa u CEO u bym lah ban wan ha ka ophis treikam jong u ha Municipal,” la ong u Bah Marbud.
Nalor kata, u Bah Marbud u la buh jingkylli ruh ïa ka Sorkar ba balei ka ai kam haduh 4 tylli ïa uwei u briew bad ki kam ba u bat ruh ki dei ki kam kiba heh ba heh. “Dei na kane ka daw ba ki samla thep kam kim ju ïoh shuh namar ba ka Sorkar ka ai kam ïa uwei u briew haduh 4 tylli,” u la bynrap.
