Shillong, Nohprah 12
Ka Hynñiewtrep Integrated Territorial Organisation (HITO) ha ka sngi Thohdieng jong ka taïew, ka la leit ban jurip ïa kawei ka ‘Check Gate’ jong ka Jaiñtia Hills Autonomous District Council (JHADC) kaba la tip kum ka Non-tribals Check Gate ban talasi ïa ki kot ki sla ne ki Trading License jong ki kali kiba wan ban pynhap mar sha Jaiñtia Hills bad ïa ki kali ban kit mar na Jaiñtia Hills bad leit pynhap pat sha kiwei ki Jylla.
Katkum ki kyndon ba la buh da ka JHADC Taxation Department, ka la kdew ba ïa ki kali kiba shu ïaid lyngba ka Jaiñtia Hills ban leit sha kiwei pat ki Jylla kum sha Mizoram, Silchar, Tripura, Manipur kim donkam ban pyni ïa ki Trading License. Ha ka jingjurip, ka HITO ka la lap ba ki shim naphang ïa ka Trading License ïa ki kali.
Kumta na ka liang ka HITO ka la phah sangeh ïa ki nongpynïaid jong katei ka ‘Check Gate’ bad ong ba dei ban shim tang ïa kiba dei ban shim. Ka HITO ka la ong ruh ba kine ki nongpynïaid ki la pynkheiñ ïa ka aiñ bad ki kyndon ba la buh da ka District Council.
“Ngin sa ai da ka jingthoh sha ka District Council ba kan leh ïa kaba donkam da kaba dawa ruh ba lada kane ka ‘Check Gate’ kam ai jingmyntoi bad ïaid lait na ki kyndon ba la buh ka District Council dei ban khang khyrdep noh shi syndon,” la ong ka HITO.
Nalor kata, ka HITO ka la maham jur ruh ïa kine ki nongpynïaid ba ïa ki kali ba dei ban shim ki dei ban shim katkum ki kyndon aiñ hynrei ïa ki kali ki bym dei ban shim pat ym dei ban shim satia.
