Nongpoh, Nohprah 12
U Myntri Rangbah ka Jylla, u Conrad K Sangma ha ka sngi Palei u la plie paidbah ïa ka Eklavya Model Residential School (EMRS) kaba nyngkong eh ha ka Jylla kaba la dep ban tei sdang ruh ban pynlong klass (academic session) ïa ki khynnah kiba pule ha katei ka skul, kaba don ha ka shnong Pahamsyiem, Ri Bhoi District.
Nalor ka jingplie paidbah ïa ka skul EMRS, u Myntri Rangbah u la buh mawnongrim ruh na ka bynta sa ar tylli ki projek ha ka shnong Pahamsyiem ba kynthup ïa ka Synthetic Athletic Track bad ka Convention Centre.
Haba ai jingkren ha ka jingïalang, u Myntri Rangbah u la ai ka burom sha ka Sorkar Pdeng halor ka jingurlong kane ka projek. “Kane ka prokram ka dei kaba la wan lyngba ka Tribal Affairs Ministry jong ka Sorkar India bad katkum ka jingbei tyngka kaba ngi la ïoh, la lah ban pynurlong ïa kane ka kam. Nga ai ka jingkhublei sha u Myntri Rangbahduh ka Ri, u Myntri ka Tribal Affairs Ministry bad ka Sorkar India hi baroh kawei kiba la ai jingkyrkhu ïa ki khynnah pule jong ngi lyngba kane ka jingtei,” la ong u Conrad.
U Conrad u la ban jur ruh ba ka pule puthi hi ka dei ka mat ba hakhmat duh jong ka Sorkar Jylla ha kine ki hynñiew snem shiteng. U la pynpaw ruh ba ka jingkyntiew ïa ka mang tyngka kaba T.2000 klur ha u snem 2018 sha ka T.3500 klur mynta u snem 2025 ryngkat ki jingbei tyngka ha ka ban tei ïa ki ïingskul ba thymmai, ki kamra klas, ki digital library, ka jingai jinghikai pyntbit ïa ki nonghikai. Ka pule puthi hi kam dei satia tang ha ki kot ki sla, ban ïoh jingtip lane ban ïakhun eksamin, hynrei ka dei ban wanrah ïa ka lawei kaba phyrnai ïa ka Jylla.
Na ka liang u Myntri Rangbah u la kubur ruh ïa ka jingeh kaba ka tnad pule puthi ka ïakynduh ha kine ki phew snem jong ka jingïaid lynti, hynrei na ka liang jong ka Sorkar ka dang ïaleh ban pynjanai bad pynbha ïa ka rukom treikam bad ba kala don ruh ka jingsdang ban ïaid beit ki rukom treikam wat lada ki dang don ki jingeh hangne hangtai.
Ha kaba ïadei pat bad ka jingkynthoh jong kiba bun pyrshah ïa ka Sorkar Jylla, u Conrad u la pynshai ba ki projek bapher-bapher la pyntreikam ha kylleng ka Jylla. “Ngim ngeit ba tang namar kawei ka thaiñ, kam dei na kajuh ka jingngeit ne ka jaidbynriew, ba ngi hap ban iehbeiñ noh ïa ki. Haba phi long Myntri Rangbah, phi dei u Myntri Rangbah jong baroh ki nongshong shnong ka Jylla la ki dei kiba thep vote ïa phi ne kim dei makna ruh,” u la ong.
U la pynpaw ruh ba ka ju jia haba u leit ban buh mawnongrim lane plie ïa kino-kino ki projek thymmai ha rilum Khasi, kin don kiba kynthoh ba sha rilum Garo pat kim ïoh eiei bad haba u leit sha rilum Garo pat kin don kiba kynthoh ba sha rilum Khasi kim ïohi eiei bad kyntu ba dei ban sangeh mardor ïa kane ka rukom pyrkhat pyrdaiñ kaba pynïaphiah bad pynsniew, naba ka Sorkar ka trei na ka bynta ka jingmyntoi jong baroh hi ki paidbah ka Jylla.
Shuh shuh, u Myntri Rangbah u la kyntu ïa ki paidbah ban ïatylli bad don ïa ka rukom pyrkhat kaba ai mynsiem, khamtam ki khun samla ba ki dei ban kmen haba ki wan ki kam pynroi ha ka Jylla la ka dei ha rilum Garo, ha Nongpoh, ha Nongstoiñ, ha Williamnagar ne ha Khliehriat ruh naba ki dei ki paidbah ka Jylla hi kiba ïoh jingmyntoi, ki khun samla ki ïoh jingmyntoi bad kyrmen ba kin don kiba sngew sarong bad ai jingïaroh ba mynta la lah ban plie noh ïa ka skul EMRS bad ka jingbuh mawnongrim ïa ka Synthetic Athletic Track bad ka Convention Centre ha Nongpoh kaba long ka jingmyntoi jong ki nongshong shnong ka Jylla.
Ha kane ka sngi la wan ban ïadon ryngkat ruh u Bah Lahkmen Rymbui, Myntri ka tnad Education, u Bah Wailadmiki Shylla Myntri ka tnad Sports & Youth Affairs, u Bah Sosthenes Sohtun Myntri ka tnad Community & Rural Development, u Bah Mayralborn Syiem MLA ka Nongpoh, ka Kong Rona Khymdeit MDC ka Nongpoh nalor kiwei-kiwei ki heh ki haiñ bad ophisar Sorkar.
