Shillong, Nohprah 12
Ka Meghalaya State Network of Positive People (MSNP) ha ka jing -ïatreilang bad ka Megha -laya AIDS Control Society (MACS) ka la pynlong ïa ka program ban kynmaw ïa ka ‘World AIDS Day’ da ka jingïakynduh lang hapdeng ki briew ba don jingpang HIV lane ka Greater Involvement of People Living with HIV/AIDS (GIPA) ha Shillong.
Ha kane ka sngi ka la don ruh ka jingïathir sani bha halor ka jingpang HIV/AIDS, kumno ban ïada ïalade na u khñiang jingpang bad kumno ban ïoh ki lad jingïada.
Haba kren ha kane ka sngi ka Project Director jong ka MACS, ka Dr. KL Ïawbor ka la pynpaw ba ka Meghalaya ka don ha ka kyrdan ba 6 hapoh ka Ri na ki Jylla ban bun ki briew ba don jingpang HIV.
Ka Dr. Ïawbor ka la ong ba kaba dei ka kamram jong iwei pa iwei ban ïatylli khnang ban pynkhlaiñ ïa ki rukom ïalap paidbah haba ïadei bad ki daw ba ki briew ki ïoh ïa u khñiang jingpang HIV. Ka thong jong ka MACS ka dei ban ïada ïa ka jingim briew, namar man ka jingim ka long kaba kordor bad ym dei ban ïehbeiñ ïano-ïano ruh ïa ki briew kiba don ïa u khñiang jingpang HIV/AIDS.
“Lada ngi kloi ban shim ïa kine ki jingkitkhlieh, ngin lah ban pynduh jait ïa u khñiang jingpang HIV/AIDS napoh ka Jylla ha ki snem ban wan” la ong ka Dr. Ïawbor.
Ka Dr. Ïawbor ka la pyntip ba ka jingjngai ki jaka sumar lane ki ART Centre kadei kawei kadaw ba ki briew ba don jingpang HIV (People Living with HIV) kim wan shuh shakhmat ban shah sumar haba ïadei bad ka koit ka khiah jong ki.
Ka la ong ba ka MACS ka nang pynïar ïa ka jingtreikam bad dang shen ka MACS ka la ai jingkyrshan ïa ki ART Centre kiba don ha West Jaiñtia Hills, East Jaiñtia Hills nalor ka jingrakhe Advance Christmas bad ki khynnah kiba shah ktah ha u khñiang jingpang khnang ban pynphriang ïa ka jingïeid bad jingïatylli.
