Shillong, Nohprah 12
U coach ka Liverpool, u Arne Slot u don ha ka jingeh hadien ka jingïakhaid ka Liverpool ha ka Leeds, haba u Mohamed Salah, u la kynthoh ïa u bad ïa ki nongpynïaid jong ka klob, ha ka jingïakren hadien ka jingïalehkai, kaba la buh jingkylli, hato ka por jong u ha Anfield ka la jan poi sha kaba kut noh.
Ka Liverpool, kaba long ka lahduh ha ka Premier League jong ka aïom ba la lah, ka la sdang ban ïalehkai sniew ha kaba ka la jop saw sien na ki 15 sien ïakhun ha ki lympung ïalehkai bapher bapher bad mynta ka la ïakynduh ha ka jingeh ha kaba ka lah ban duh noh ïa uwei na ki rangïalehkai ba kynsai.
Tang u Ian Rush bad u Roger Hunt kiba la thep kol bun na ka bynta ka klob ban ïa u Salah, uba la thep 250 kol. Utei u rangïalehkai shakhmat u la noh synñiang na ka bynta ban rah ïa ar tylli kin nam lahduh ha ka league, kynthup ïa ka samoi ba la dep, ha kaba u la jop bun tylli ki khusnam shimet bad u Slot u la lah ban pynskhem ïa ka nam jop ha ka snem ba nyngkong jong u.
Hynrei mynta u Salah u la ong ba ka jingïadei jong u bad u Slot ka la pait la pra hadien ba la pynshongben ïa u haduh lai tylli ki jingïalehkai.
“Nga sngewsih shibun eh ba ngan shah leh shilliang. Nga la leh shibun kiei kiei na ka bynta kane ka klob ha kine ki snem bad khamtam eh ha ka samoi ba la dep,” la ong u Salah ha ki lad pathai khubor.
“Mynta nga la shah pynshong ben bad ngam tip balei. Nga sngew ba ka jingleh ka pynpaw ba ka klob ka la bret noh ïa nga najrong bus. Kane ka paw shai ba don kiba kwah ba ngan ïoh ïa ka jingshah kynnoh.”
U Slot u la kyrshan ïa u Salah ha kane ka samoi watla une u rangïalehkai ba 33 snem ka rta u la ïakynduh jingeh ban nangkiew ha ka jingïalehkai. U Salah u la thep san kol ha ki 19 tylli ki jingïalehkai bad u la shah kynthoh ba um shym la noh synñiang na ka bynta ka klob.
U Salah bad ka Liverpool ki la pynkhreh lypa ban ïajngai shwa shipor, ha kaba une u rangïalehkai u la thmu ban ïasoh bad ka Egypt na ka bynta ka Africa Cup of Nations hadien ka jingïakhun pyrshah ïa ka Inter Milan bad ka Brighton mynta ka taïew.
Na ka liang u Salah u la ai jingmut ba ka jingïalehkai pyrshah ïa ka Brighton kan lah ban long ka jingïalehkai kaba khatduh jong u ha Anfield.
“Ngan lehkmeh ha katei ka jingïalehkai namar ngam tip kaei ka ban jia mynta,” u la bynrap. “Ngan sa don ha Anfield ban ong khublei ïa ki nongkyrshan bad ban leit sha ka Africa cup. Ngam tip kaei ka ban jia ynda nga la don hangtei.”
Kumba ka paw ka Liverpool kam shym la lah ban jop da 2-0 ne 3-2 kol ïa ka Leeds ha kaba ka la pynlong ïa ki ban jop tang ar sien na ki 10 sien ïakhun, ha kaba ka la hiar sha ka kyrdan ba phra bad ka la duh jingkyrmen ban rah biang ïa ka nam lahduh mynta ka aïom.
