Shillong, Nohprah 12
Ka Shillong Sport Association hynne ka sngi ka la pynbna paidbah ba lashai ka sngi kan don ka jingïalehkai phutbol final jong ka Champion cup 2025 ban ïalehkai hapdeng ka Shillong Lajong Football Club pyrshah ïa ka Nongkseh Sports Club ha SSA Stadium, Shillong ha ka por 4:30 baje janmiet.
U Assistant General secretary ka SSA u Bah Samran Syiem u la ong ba lashai ka sngi ka 13 tarik Nohprah 2025 kine baroh artylli ki kynhun ïalehkai kin ïaknieh ïa ka nam lahduh jong Champion cup 2025. U la ong ruh ba kine baroh ar tylli ki team ki kynthup ïa kawei kaba jop ïa ka 1st division bad kawei ka dei ka nongjop ha ka Shillong Premier League bad kine baroh artylli ki team ki dei kiba la pynkhreh bha bad ki dei ruh ki team ki bym pat mad ïa ka jingshah rem ha kane ka samoi ïalekai.
U Assistant Coach ka Shillong Lajong u Bah Lekini Suting u la ong ba ha ka jingïalehkai final lashai ka sngi kin pyrshang katba lah ban ïaleh tyngeh ban ïalehkai bha ban poi sha ka thong. U la ong ba ka kynhun ka long ba la pynkhreh ban poi sha ka jingjop watla ka ïoh ban ïakhun bad ka team kaba khlaiñ.
U Coach jong ka Nongkseh u Bah Richard Nongneng u la ong ba ka jingthmu jong ka kynhun ïalehkai ka long ba kin khang ïa une u snem da ka jingjop. Kumjuh ruh u Captain ka kynhun Nongkseh u la ong ba na ka liang ka kynhun kan ïaleh katba lah ban bud ïa ka jinghikai u coach.
La kan dei ka Nongkseh ne ka Shillong Lajong, kawei ka kynhun la tikna ba kan ïoh ban lehkmen ïa kaba kam pat ju ïoh ban leh ha shuwa kane ha ka janmiet jong ka sngi Saitjain, katba kiwei kin sakhi ïa ka jingrem jong kawei na ki kynhun ka bym pat mad ïa ka jingrem ha kane ka samoi kaba mynta. Namar ba kan don tang kawei ka ban ïohrah ïa ka trophy kaba nyngkong eh jong ka SSA Champions Cup 2025.
