Shillong, Nohprah 12
U khlieh nongïalam ka UDP, Bah Metbah Lyngdoh u la pynpaw ïa ka jingkyrmen skhem ba ka seng jong u kan sa leh bha ha ka ilekshon ban wan ha u snem 2028, da kaba antad ba kin nang kiew arshah ha ka jingïoh nongmihkhmat ban ïa kaei kaba ki ïoh ha ka ilekshon jong u snem 2023.
“Ngi kyrmen skhem, ngi ïaid sha kata hi ka liang, kum ka seng ‘riewlum, ngi sngewskhem bha…2023, ngi don arshah haba phai sha ki jingkheiñ, bad 2028 – ngi khmih lynti ruh ba ngin sa kiew arshah haduh kata ka por,” la ong u Bah Lyngdoh ha ka Sngi Palei.
U la pynshong nongrim ïa ka jingkyrmen skhem jong ka seng ha ka jingnang kiew ka jingithuh ïa ki seng ‘riewlum hapoh ka Jylla.
“Nga tikna ba ki paidbah kin sngewthuh kumno ban ailad bad ai bynta ïa ki seng ‘riewlum ha ka rukom kaba kham bha,” u la bynrap.
Halor ka ilekshon sha ka Garo Hills Autonomous District Council (GHADC), u Bah Lyngdoh u la ong ba ka seng ka dang hap ban pynbeit shuwa ïa ka buit treikam jong ka.
“Haba phai sha ka GHADC, ngi don ka kynhun ki nongïalam jong ka seng ha Ri-lum Garo…kin dang hap pynsngew sha ngi ïa ka rai khatduh, hynrei kaba paw, lehse ngi lah ban pynïeng kyrtong na ki katto-katne ki konstitwensi,” u la ong.
Utei u nongïalam ka UDP u la kdew ba ka seng kan sa shim ïa ka rai kaba khatduh halor ka ilekshon GHADC ha kine ki taïew ban wan.
