Shillong, Nohprah 12
U Myntri Rangbah ka Jylla, u Conrad K. Sangma, ha ka Sngi Thohdieng, u la leit jngoh ïa ka Shillong Medical College (SMC) kaba don ha Pasteur Institute ka barim, ha Lawmali, Shillong bad ïakynduh ruh ïa ka kynhun banyngkong ki samla pule jong kane ka kolej.
Ha kane ka sngi la donlang ruh u Myntri ka tnad ka Koit ka Khiah, u Bah Wailadmiki Shylla, ki heh ophisar ka tnad ka Koit ka Khiah bad ka kolej kumjuh.
Haba kren ha kane ka sngi, u Myntri Rangbah u la pynpaw ïa ka jingkmen bad jingsngewhun ban ïoh ïakynduh bad ïakren bad ka kynhun banyngkong jong ki samla pule bad bynrap ba ka Shillong Medical College ka dei ka jaka pule kaba kongsan bha na ka bynta ka Jylla Meghalaya.
“Nga dang kyrmen ba ïa kane ka shlem pule yn sa plie noh shen da u Myntri Rangbahduh ka ri hynrei katba ngi dang ap ïa ka jingplie paidbah jong ka, ngam shym la kwah ban ap ha ka ban ïakynduh ïa ki nonghikai bad ki samla pule,” u la ong.
U la ong shuh-shuh ba ka Shillong Medical College ka la long ka projek kaba tynjuh bha na ka bynta ka Jylla bad pynpaw ka jingsngewnguh ïa ka Myntri barim ka tnad ka Koit ka Khiah, ka Dr. M. Ampareen Lyngdoh lem bad ki ophisar ka tnad kiba la minot bad aiti lut ha ka ban saiñdur ïa ka kolej.
“Katba ngi dang don shibun ki jingeh hakhmat jong ngi bad kiei-kiei kiba donkam ban leh, ngi dang ïaineh ha ki jingkular jong ngi,” u la ong.
“Nga ai khublei ruh ïa ki doktor kiba don ha ka jingshakri kiba la jied ban long shi bynta jong kane ka kolej, kumjuh ïa ka jingtbit bad jinglam lynti jong ki,” u la ong.
Haba ïakren bad ki samla pule, u Sangma u la ong ba ka dei ka khyllipmat ka ban sah kynmaw naba yn kynmaw ïa ki kum ki kynhun pule banyngkong jong ka Shillong Medical College da kaba bynrap, “Phin long ruh, khamtam – phin long ka nuksa na ka bynta ki samla pule ki ban sa wan bad ka don ka jingkhmih lynti kaba khraw na phi baroh.”
Shuh shuh u la kyntu ïa ki samla pule ba kim dei ban duh mynsiem haba ki tyngkhuh ïa ki jingeh bad ong, “Haba sdang ïa kaei-kaei kaba thymmai, ki don beit ki jingeh hynrei nga pyntikna ïa phi ba ngi don hangne ban kyrshan ïa phi,” u la ong.
Hadien kane, u la ïoh lad ban ïakren bad ki samla pule lem bad ki nonghikai kiba la pynsngew ïa ki jingshem jong ki.
