Shillong, Nohprah 12
Ka Meghalaya kaba dei ka bynta jong ka Indo-Burma Mega Biodiversity Hotspot, ka la pynpaw biang sa shisien ïa ka spah Mariang ba la buhrieh jong ka. Ki riew wadbniah na ka Zoological Survey of India (ZSI), Kolkata, ki la lap ïa ki ar tylli ki jait thapbawa ba thymmai kata u Asemonea dentis bad u Colyttus nongwar.
Ka Asemonea dentis ba la batai thymmai ka pyni dak tang ïa u nongmihkhmat ba lai jong ka ri India jong ka jait Asemonea, ka kynhun kaba rit bad kaba dang duna bha ka jingwad bniah ha ka ri. Ki jait jong kane ka jait ki long kiba rong saw bad ki shong hapdeng ki sla dieng bad ka jingpynphriang kaba kongsan jong ki, ka long ha Africa bad Asia. Ïa une u jait la ai kyrteng hadien ka jingmih kum u bniat ha ka sniehdoh jong u shynrang.
Ka jaid Colyttus nongwar, ka thew ïa ka jingpynrung kaba kongsan ha ka jaid Colyttus kaba la tip bha ha ki ri Mihngi. La pynphriang ha ki katto katne ki ri jong ka thaiñ Shatei Lam-Mihngi jong ka Asia, ïa kane ka jait la ju pynïeng mynshuwa ha India tang da kawei ka jait. U Colyttus nongwar, uba long mynta uba ar, la ai kyrteng ïa u na ka shnong Nongwar, East Khasi Hills, na kaba la lap ïa u. Ïa kane ka kynhun wadbniah la ïalam da u Dr. Souvik Sen ryngkat lang bad u Dr. Sudhi P. P, bad u ‘field guide’ u Nathanael Newmai. Kine ki jinglap ki pynskhem biang ïa ka jinglong kyrpang jong ki jingthaw ba im jong ka thaiñ Shatei Lam-Mihngi jong ka ri India. “Khyndiat eh ki jingwad bniah kiba ryntih la pynlong ha kane ka thaiñ,” la ong u Dr. Sen. “Kaei kaba ngi dang thoh mynta ka long tang ka jingpeit bniah-bun kiwei pat ki jaid jingthaw ki dang ap ban lap.”
Ïa ki jingbatai ba pura jong ka saïan shaphang u Asemonea dentis bad u Colyttus nongwar la pynmih ha kaba khatduh jong ka Zootaxa, ka kot khubor ba pawnam jong ka peer-reviewed journal kaba tbit bha ha ka jingthew ïa ki mrad.
