Shillong, Nohprah 12
Ka Hynñiewtrep Youth Development Council (HYDC) East Jaiñtia Hills District ka la pynbna paidbah ba kan sa pynlong ïa ka jingïaid paidbah ban pyrshah ïa ka jingthmu ban pynlong ïa ka ‘Public Hearing’ ha ka shnong Daistong.
Ka seng ka pynpaw ruh ïa ka jingpyrshah ïa ka jingthied jaka be-aiñ jong ka Shree Cement ha Elaka Nongkhlieh, East Jaiñtia Hills.
Ka jingïaid paidbah kan sa long ha ka 16 tarik u Nohprah 2025. Ïa kane la pynbna da u Bah Mihsalan Thoo, Presi-dent ka HYDC, East Jaiñtia Hills.
Ha ka kyrwoh ba la phah da u Bah Mihsalan u la ong ba ka jingpyrshah jong ka seng ïa kane ka jingkhot pynlong ïa ka Public Hearing ban shna ïa ka karkhana dewbilat ha Daistong ha ka 19 tarik u Nohprah 2025, ka dei halor ka jingujor jong ki nongshong shnong ka Daistong ban pyrshah bad pynduh pyndam noh shi syndon ïa ka jingangnud ka Shree Cement ban buh karkhana ha Elaka Nongkhlieh bad ban khlong ruh ïa ki mawshun kiba don ha katei ka jaka.
“Ka jingkynnoh jong u Bah Bunlang Phyrngap, Rangbah Shnong ka Daistong ba ka jingai NOC da u Rangbah shnong barim ka dei kaba la pynkheiñ ïa ka riti synshar shnong ka Daistong bad ka long pyrshah ïa ka sur ki nongshong shnong jong katei ka shnong,” u la ong.
U la pynkynmaw ruh ba u Rangbah shnong ka shnong Daistong, u Bah Bunlang Phyrngap u la leit ban ujor sha ka ophis u Deputy Commissioner, East Jaiñtia Hills District ban pynduh pyndam noh ïa katei ka NOC ba la ai da utei u rangbah shnong barim.
U la ong “Haba ïadei bad kane, ka seng ka khot ka wer ïa ki para doh para snam ban ïa don lang ban pyrshah ïa ka jinglilam ïa ka khyndew ka shyiap sha ki mynder shi sngi”.
Shuh shuh u la ong ruh ba ka seng hi baroh kawei ka sngew ba ka jingdie duh ïa ka khyndew ka shyiap ka dei ka jingduhnong kaba khraw ïa ka jaidbynriew.
“Ka seng ka da sheptieng hi ruh ba ïoh lashai la shi sngi kane ka jingdie ïa ka khyndew ka shyiap kan pynlong pynban ïa ki nongshong shnong ka Elaka, ba kin long tang ki riew shongwai bad ki nongtong um bad thohdieng jong ki mynder, ha la ka shnong,” la bynrap u Bah Mihsalan.
U Bah Mihsalan u la khot la wer ïa baroh ban ïa poi lang ban ïaid ïa ka ‘Peaceful Protest Rally’ pyrshah ïa ka jinglilam be-aiñ ïa ka khyndew ka shyiap ka ban sdang naduh ka Shnong Dkhiah bad pynkut pat ha ka jaka ba don u Motdur u Woh Kiang Nangbah, hajan ophis jong u Deputy Commissioner, East Jaiñtia Hills District.
