Shillong, Nohprah 12
Ka Meghalaya Power Distribution Corporation Limited (MePDCL) ka la pynjlan ïa ka ‘One-Time Settlement Scheme’ (OTS) 2025-26 sha ki nongpyndonkam bording ha ki jaka ba la tip kum ki ‘Distribution Franchisee’, ba kynthup ïa ka Mawsynram, Phultan, bad Nongalbibra, haduh ka 31 tarik u Nohprah, 2025.
Kane ka skhim, kaba la pynbna nyngkong ha ka 15 tarik u Nailur, 2025, ka thmu ban pynbiang ïa ka lad sha ki nongpyndonkam bording ban pynbeit ïa ki jingsiew kiba dang sah.
Ka OTS kan treikam na ka bynta ki ‘Bill’ ba la pynmih haduh ka 11 tarik u Risaw, 2025, ha kaba baroh ki kyndon kin dang sah kumjuh.
La bthah ïa ki nongpynïaid ‘Distribution Franchisee’ ba kin pynbna paidbah ïa kane ka skhim ban pyntikna ba ki nongpyndonkam bording kin tip shaphang ki jingmyntoi.
Ka MePDCL kan sa pynshisha bad pynbeit ïa ka pisa ba dang sah, bad baroh ki jingsiew ba la lum hapoh ka skhim yn phah sha ka MePDCL.
