Washington, Nohprah:
Ka US ka la pynjari da ki jingpynjari ïa lai ngut ki khun ksiew jong u President ka Venezuela, u Nicolás Maduro, nalor kiwei pat, ha ka Sngi Palei, katba u President Donald Trump, u dang ap khmih lynti ban pynjynjar shuh shuh ïa ka jaitbynriew jong ka South America.
Kitei ki jingpynjari kyndon ba thymmai halor u Franqui Flores, u Carlos Flores bad u Efrain Campo, ki dei hadien shisngi ba u Trump, u la pynbna ba ka US, ka la bat ia kawei ka jhad kit umphniang, ha rud duriaw jong ka Venezuela. La kynthup lang ruh ha kitei ki jingpynjari, ki nongkhaii jong ka Panama, u Ramon Carretero Napolitano, 6 tylli ki kompeni bad 6 tylli ki lieng kiba don lama jong ka Venezuela, kiba shah kynnoh ba ki kit ia ka umphniang Venezuela.
Ka ophis jong ka Treasury kaba peit ia ki marpoh khyndew, ka la pynmih ia ka thup jong ki jingpynjari ha ka Sngi Palei.
Kine ki kyndon jingpynshitom ki long ban khanglad ia ki, ban ioh ia kino- kino ki mar ki mata ne ki mar pisa kiba la bat ha US bad ki jingpynshitom ki long ban khanglad ia ki kompeni bad ki nongshong shnong jong ka US ban iatreilang bad ki. Kumta la ong ba ki bank bad ki jaka ai pisa kiba pynkheiñ ia kata ka jingpyrkhing kin pynngat hi ia lade ha ki jingpynshitom ba la buh.
U Treasury Secretary ka US, u Scott Bessent u la ong ha ka kyrwoh ba u Nicolas Maduro bad ki paralok kam runar jong u ha Venezuela, ki pynshlei ia ka ri America da ki dawai pynbuaid kiba pynsniew ia ki paidbah America.” “Hapoh ka jingïalam jong u President Trump, ka Treasury ka buh ïa ka jingkitkhlieh ïa ka sorkar bad ïa ka kynhun jong ki paralok bad ki kompeni jongka na ka bynta ki kam runar ba dang ïai bteng jong ka,” u la ong.
Kane kam dei ka sien kaba nyngkong ba ka longïing jong u Maduro ka donkti ha ka jingïakynad saiñ hima- sima bad ka US.
Ha u bnai Risaw 2022, ka Venezuela ka la pyllait ïa ki hynriew ngut ki nong America kiba la shah set patok kum ka jingsiew kylliang ïa ka America ban pyllait ïa u Flores bad u Campo, kiba la shah set patok da ki snem halor ka jingshah pynngat ha ki jingdih buaid. Kitei ki arngut ki la shah kem ha Haiti ha ka jingtohkit jong ka tnat pynjari drok ha u snem 2015 bad la rai pynrem ia ki ha u snem uba bud ha New York.
U Carlos Flores u la shah pynshitom ha u bnai Naitung 2017 hynrei la weng noh ïa u na ka thup jong ka Treasury ha u snem 2022 ha ki snem jong ka jingsynshar u Biden ha ka jingpyrshang ban kyntiew ïa ka jingïakren na ka bynta ka elekshon synshar paidbah ha Venezuela.
Kane ka jingleh ba khatduh jong ka US pyrshah ïa ka Venezuela, ka long hadien ka jinghiar thma kaba shyrkhei kaba ka US ka la pynlong ïa ki jhad kiba la kynnoh ba ki dei ki jhad kiba shalan drok ha duriaw bah Caribbean bad shaphang mihngi jong ka Pacific Ocean, kiba la pynïap ym duna ïa ka 87 ngut ki briew naduh ba sdang jong u bnai Naitung.
U Trump u la pynksan ïa ki jingshah thombor kum ka jingpynjur kaba donkam ban khanglad ïa ka jingtuid jong ki drok sha ka ri America bad u la pynskhem ba ka US ka don ha ka “jingïalehkai tiar” bad ki kynhun nongkhaii drok.
