Grossglockner, Nohprah:
U Thomas Plamberger, u ba la shah kynnoh ba u dei ma u, uba la iehnoh ia ka samla jong u, kaba 33 snem ka rta, ka Kerstin Gurtner, haduh ba kan da iap eh bad khlad noh syndon ha u lum Grossglockner jong ka Austria, ha kane ka por pat, la ong ba u la shah pynngat ha ka jingshah pynngat ha ki kyndon ba iadei bad ka jingpyniap briew namar ka jingbym shim khia jong u ia la ka jong ka briew kaba don lang bad u ha kti- ha kjat hapdeng ka jingialam lynti jong u sha katei ka jingleit jongki. Hadien ba la sei ïa ka met jong ka, une u rangbah ba 36 snem ka rta, u la pynpaw paidbah ïa ki kyntien sngew myllung ha ka rynsan ‘Instagram’ jong u, ha kaba u la pynpaw ïa ka jingsngewsih bad jingsngew kthang kaba jur halor ka jingduh noh jong u ia la ka jong ka baieid.
“Nga sngewsih ia phi. Nga sngew kthang haduh katta- katta. Junom ha ka dohnud jong nga. Khlem ma phi, ka jingim jongknga kam don jingmut,” u la thoh kumba la shim ha ka post kaba u la pyllait paidbah hadien ka jingkhlad jongka.
U Plamberger bad ka Gurtner ki la sdang ïa ka jingkiew jong ki sha u lum ba jrong tam jong ka Austria ha kaba sdang jong une u snem ha ka 18 tarik u Kyllalyngkot, hynrei ka Gurtner, ka nongkiew lum ba dang shu ïaid lynti thymmai ha katei ka kam, ka la thait bad ka la shah khriat hajan u lum ha ka jingdeit-thah kaba -17 degree F bad ka lyer kaba jur haduh 45 mph. kumta, la kynnoh ba dei utei hi u samla jongka, uba la iehnoh ia ka marwei, da kaba kynnoh ba u wad jingiarap, hynrei ki nongmudui ki kynthoh ba u la iehnoh ia ka, khlem ki jaiñ kup ne ki tiar pynsyaid ne jaka sah kiba biang naka bynta jongka.
