Shillong, Nohprah 12
ka All Meghalaya Kick-boxing Association sha shi sien pat ka la wan rah nam bad burom ïa ka jylla da ka jinglah jong ki ban khur bun tylli ki takma ksiar, takma rupa bad ruh ki rnong ha ka National Championship kaba la pynlong ha Bhubaneswar Orrisa.
Kane ka kynhun ka la mih na ka jylla ha ryngkat kumba 140 tam ngut ki rang, ki thei bad ki hep kiba rit ban leit ïashim bynta ha kane ka Championship bad ha kane ka jingïakop ki rang bad ki thei ïalehkai na ka jylla ki la ïoh ïa ka 1st runners up bad khur ruh haduh 124 tylli ki medal. Kaba pynsngewkmen shuh shuh ka dei ba na pdeng ki rangïalehkai arngut ki la ïa shim bynta ha ka Professional fight kaba dei jong ka ISKA Kunkhmer Pro-fessional fight Organization kaba la pynlong da ka Indian Association of Kickboxing Organization.
Kane ka kynhun ka la wan phai noh sha ka jylla ha ka 10 tarik u Nohprah haba ka ïa kane ka kynhun la pdiang sngewbha ha nongbah Guwahati da u General Secretary ka North East Kickboxing Association u Putul Sonowal, shuh shuh haba ki poi sha ka jylla la pdiang sngewbha ïa ki da ki nongïalam jong ka AMKA bad ki kmie kpa kiba la wan ban ïa don bynta lang ha kane ka sngi.
Haba kren ha kane ka sngi na ka liang u President ka AMKA u Bah Samuel Hashah u la pynpaw ïa ka jingsngewnguh ïa ki rang bad ki thei ïalehkai ki ba la ïalehkai bah bad wan rah nam bad burom ïa ka jylla lyngba ka jingjop ka jong ki, ka jingtrei shitom ka jong ki ka wanrah ïa u soh u ba thiang.
Shuh shuh u la ïathuh ruh ba ha kane ka kynti ka kynhun kam shym la ïoh jingïarap nano-nano wat na ka Sorkar ruh, baroh ka dei beit da ka jingkyrshan jong ka Association bad ki kmie ki kpa jong ki khynnah, ba ki khynnah ki la ioh ka lad ban leit ban ïa shim bynta. U Bah Samuel u la bynrap ruh da kaba ong ba u don ka jingkyrmen ba ka Sorkar kan ai jingkyrshan ïa kine ki rang bad ki thei ïalehkai kiba la wan rah nam bad burom ïa ka jylla lyngba ka Scholarship kaba ka Sorkar jylla ka la pynbna ban ai.
