Shillong, Nohprah 12
U Lionel Messi un plie ïa u motdur jong u hi u ba jrong 21 metre (70 phut) ha India ha ka sngi Saitjaiñ haba u sdang ïa ka jingwan jngoh ïa ka ri kaba lai sngi kaba la wanrah jingkmen jong ki nongkyrshan. Katei ka jingtei dur da ka nar ha Kolkata, kaba pyni ïa U Messi, ba u bat shajrong ïa ka trophi World Cup, ka dei shi bynta jong kaba ki khot ka ‘GOAT Tour’, kaban leit sha ki saw tylli ki nongbah jong ka ri India bad ka jingïakynduh kaba lah ban long bad U Narendra Modi, Myntri Rangbah duh ka Ri. Une u rangïalehkai ba 38 snem ka rta jong ka Argentina bad ka Inter Miami un sa plie paidbah ïa une u mawkyrteng ha ka rukom lyngba ka ‘online’ ym markhmat na ka bynta ka jingshngaiñ. La buh ruh ïa ka “Hola Messi” ha Kolkata na bynta ki nongkyrshan ha kaba la pyni ïa ka dur jong u Messi uba shong ha ka khet.
Une u nongjop ba 8 sien ka Ballon d’Or un ïakynduh ruh ïa u khlur ka Bollywood u Shah Rukh Khan bad u kapten barim jong ka kynhun kriket ka India u Saurav Ganguly ha ka jingleit jngoh jong u sha Kolkata.
Ha shwa ba un wan, u Messi u la ong ba ka long ka burom ban leit sha India bad ban ïakynduh bad ki nongkyrshan.
“Ka India ka dei ka ri kaba kyrpang bha bad nga don ki jingkynmaw kiba sngewtynnad na ka por 14 snem mynshwa, ki nongkyrshan ruh ki long kiba sngewtynnad shibun”, la ong shuh-shuh u Messi ha ka kyrwoh.
Hadien ka Kolkata, ha kaba u Messi un ïakhun ïa ka jingïalehkai paralok kaba lyngkot, un leit sha Hyderabad, Mumbai bad New Delhi.
Utei u rangïalehkai barim jong ka Barcelona bad ka Paris Saint-Germain un mihkhmat na bynta ka Argentina ban ïakhun ïa ka World Cup ha u Jylliew-Naitung ha North America.
