Khliehriat, Nohprah 14
Ki bor pynïaid District jong ka East Jaiñtia Hills ki la leit ban pynpra noh phom ïa ki hynñiew tylli napdeng ki khatwei tylli ki karkhana coke kiba treikam beaiñ khlem ka jingbit bad bud ryntih ïa ki kyndon ïada mariang bad ïa ki hukum ka ïingkashari.
Ha ka kyrwoh lyngba ka durkhih (video) ba la pynmih ha ka 14 tarik Nohprah, u Deputy Commissioner jong ka East Jaiñtia Hills u Shivansh Awasthi u la pyntip ba ka kynhun kaba kynthup ïa ki ophisar bad nongtrei na ka Meghalaya State Pollution Control Board bad ka tnad Pulit ki la leit ban pynpra noh ïa ki 7 tylli napdeng ki 11 tylli ki karkhana coke ba khlem ïoh jingbit, ha kaba ki saw tylli kiwei pat la shem ba la dep ban pynpra hi da ki trai karkhana.
Baroh ki don haduh 16 tylli ki karkhana coke ba la ithuh kum kita kiba treikam beaiñ khlem da ïoh jingbit ha kaba 5 tylli ki dei kiba la dep ban pynpra kham hashwa.
Ki bor pynïaid District ki la dep ban phah jingtip sha baroh ki 11 tylli ki karkhana kiba dang sah naduh u bnai Risaw 2025, da kaba dawa ba ki dei ban bud beit ryntih ïa ki kyndon kaba ki dei ban ïoh jingbit bad ka jingithuh.
“Namar ba ym shym la ïoh pdiang ïa kano kano ka jubab, kumta ka kynhun ka la ïaid shakhmat ban leit pynpra noh ïa kine ki karkhana ha ka 13 tarik Nohprah 2025,” ong u Awasthi.
Kine ki 16 tylli ki karkhana coke ki dei kiba la pynïeng beaiñ khlem da ïoh ïa ki jingbit katkum ki kyndon ba la buh ha ki jingpynbna jong ka Sorkar.
Hadien kane ka jingleit pynpra ha ka sngi Saitjaiñ ba la lah, mynta baroh kine ki 11 tylli ki karkhana coke ki bym shym la ïoh jingbit kim lah shuh ban treikam, la pynthikna u Deputy Commissioner.
