Shillong, Nohprah 14
Ka All Meghalaya Dancers Association (AMDA) ka la pyntip ba kan don ka jingïakop shad kaba la ai kyrteng Meghalaya Superstar National Level ha ka 27 tarik mynta u bnai Nohprah 2025 ha State Central Library Shillong.
Haba ïakren bad ki nongthoh khubor ha Shillong Press Club u Bah Kit Thabah uba dei u President bad Bah Mickey Mawlong Secretary Youth Talented ka AMDA ki la ïathuh ba ïa ka Meghalaya Superstar National Level la shah ïa baroh kat kiba kwah ban ïa shim bynta kiba na baroh ki Jylla.
Ki la ïathuh ba ha kane ka jingïakop shad kin wan ki nongbishar kiba la paw bha ha ka ri kiba la shim bynta ban ïa kop ha ki rynsan ba heh hapoh ka ri bad sha kiwei ki ri ka pyrthei.
Shuh shuh ki la pyntip ba ka jingpynlong ka AMDA ïa kane ka jingïakop shad kan long ruh kum shi bynta ban rakhe ïa ka jingdap 25 snem ka kynhun naduh ba la seng ïa ka.
Ki la pyntip ba ha ka 26 tarik mynta u bnai kin pynlong ïa ka jingai jinghikai ïa ki samla kiba donsap ban shad bad Hiphop ban sa wan ai jinghikai na kiba shimbynta ha ka India Super Star.
Ki la pyntip ba kane ka jingïakop kan don bun kyrdan ïa ki khynnah, ki samla bad ïa ki kynhun ruh hynrei kin pynïaid ïa ka jingïakhun khlem pyndonkam shuh ïa ki tiket voting coupon.
Ha kajuh ka por ki la ai khublei ïa u Myntri Rangbah ka Jylla u Conrad K Sangma uba la kular ban ïarap ïa kane ka prokram ba ka seng ka la leh.
Kine ki nongïalam ki la kyrpad ïa ki samla ne ki riewdonsap ban shad ba kin wan ban shim bynta ha kane ka jingïakop shad ka ban long ka lad ka lynti ïa ki bym ïoh ka lad ban leit ïa shim bynta sha bar.
