Shillong, Noprah 14
Ki kontraktor jong ka War Jaiñtia Amlarem Sub-Division kaba hap hapoh ka West Jaiñtia Hills District ki la dawa na ka Sorkar Jylla ban pyllait noh ïa ka pisa shwa ka Khristmas.
Kane ka kam baroh ki la dep trei bad kaba ki la sdang naduh u snem 2019-2021 ter ter.
Ha ka kyrwoh ba la phah da u Bah K.Pohshna u la ong ba ki kam ba ki kontraktor ki la dep trei ki kynthup ïa ka jingmaramot bad shnna ryntih ha PWD Road & Building bad kumjuh ha ka Water Resources (Irrigation) bad khamtam eh ïa ka JJM na ka PHE ba
shibun ka pisa kiba dang sahkut ba la kit ram da ki kontraktor na ka bynta ki kam ba la dep pyntrei.
U la ong “Ki nongïalam ka War Jaiñtia ki la dep ban ïa kynduh ïa baroh ki kontraktor kiba la pyntrei ha la ki jong ki jong ki tnad, ki bym pat ïoh ïa ka pisa ba la bun bun snem. Kaba la pynsngewsih ïa baroh ki kontraktor ka long ba ka Sorkar ka pyllait ïa ka pisa tang T.10 hajar bad T.15 hajar marwei bad khamtam eh ïa ka tnad PHE kaba dang pynsah ïa shibun ka pisa kiba la dep pyntrei na ka bynta ki kam ka JJM bad kiwei kiwei ruh”.
“Ngi dangdon shibun ka pisa ba dangsah. Haba ngi leit ban ïa kynduh ïa u Engineer bad SDO, kine ki ud ba kim don boe eiei bad ka jubab ba ngi ïoh ka long, ba ka shong beit ha ka bor jong ka Sorkar hapoh ka jingïalam jong u Myntri Rangbah ka Jylla, u Conrad K Sangma,” la ong u Bah K.Pohshna.
Shuh shuh u Bah K.Pohshna u la pynpaew ruh ka jingsngewsih ba mynta ka kumba 7 bad 8 ka jingkyrduh kam kyrduh jam ka long kaba phylla, ba wat ki kam ban maramot na ka bynta ki kontraktor kiba rit bad kiba heh ruh kim ïoh kam shuh la bun bun snem namar ba ki Engineer halor kan ruh ki la ud la nam ba kim don bor eiei bad ka dei beit ha ka bor jong ka Sorkar ban ai kam aijam.
U ong ba kane ka wanrah shibun ka jingeh ïa ki kontraktor ba kim ïoh kam ïoh jam shuh bad ka la buh jingeh shibun wat ban pyndap ïa ka ïing ka sem.
“Ngi dawa na ka Sorkar ba ha u snem 2026, kan ai kam ai jam lem namar ba ki don shibun ki jaka trei ban maramot ha la ki jong ki jong ki surok kiba hap hapoh ka Border Road A,larem Sub Division,” la bynrap shuh shuh u Bah K.Pohshna.
