Khliehriat, Nohprah 14
U Deputy Commissioner (DC) jong ka East Jaiñtia Hills District u Shivansh Awasthi, IAS, u la pyntip ba da kaba bud ryntih ïa ki jingbthah jong ka ïingkashari Meghalaya High Court, la thaw ïa ka kynhun ba ïatreilang ban shimkhia ban pynpra ïa ki karkhana coke ba khlem jingbit kiba treikam hapoh ka district.
La bthah ïa kane ka kynhun hapoh ka jingpeit jong u Sub-Divisional Officer, u Manish Kumar, IAS bad kaba kynthup ïa ki ophisar na ka Meghalaya State Pollution Control Board (MSPCB) bad ka tnad Pulit, ba kin pyndep ïa ka jingpynpra ïa baroh ki karkhana coke bym pat ïoh jingbit hapoh ka district.
U Deputy Commissioner u la pynpaw ba baroh 16 tylli ki karkhana coke la ithuh ha East Jaiñtia Hills District ba la buh khlem da ïoh ïa ki jingbit kiba donkam katkum ki kyndon kumba la pynbna da ka Sorkar.
Na kine ki 16 tylli ki karkhana coke bym don jingbit, 5 tylli la dep ban pynpra noh kham mynshwa.
Na ka bynta ki 11 tylli ki karkhana coke kiba dang sah, la pynmih ïa ki jingpynbna sha ki ha u bnai Lber 2025, da kaba bthah ïa ki trai ban aiti ïa ka jingbud ryntih la ki la ïoh ne em ïa ki jingbit kiba donkam na ka bynta ban treikam, hynrei ym shym la ïoh jubab eiei na kitei ki karkhana coke.
Kumta, da kaba bud ryntih ïa ki jingbthah jong ka ïingbishar Meghalaya High Court, la pynmih ïa ki jingbthah sha ki kynhun ba ïatreilang ban ïaid shakhmat ban pynpra ïa ki 11 tylli ki karkhana shna coke kiba dang sah khlem jingbit.
Ka jingpynpra ka sdang ha ka 13 tarik u Nohprah, ha kaba la pynpra ïa ki 7 tylli na ki 11 tylli ki karkhana coke bym don jingbit bad na ka bynta ki 4 tylli ki karkhana coke kiba dang sah la dep pynpra ïa ki da ki trai jong ki.
Haba kyllum baroh 11 tylli ki coke plant kiba khlem ai jingbit mynta kim treikam shuh, ong ka kyrwoh na u Deputy Commissioner.
