Shillong, Nohprah 14
U President ka Voice of the People Party (VPP) u Bah Ardent Miller Basaiawmoit u la pynpaw ïa ka jingbynñiaw ïa ka jinglong jingman jong ka saiñ pyrthei ha ka Jylla, da kaba pynpaw ba ka Sorkar ka bunkam ban pynkhreh ïa ka ilekshon 2028 ha ka jaka ban shakri ïa ki paidbah.
“U Myntri Rangbah uba dei ban pynleit jingmut ha ka synshar khadar, u dang bunkam ban leit jngoh ïa ki Konstitwensi ban kyntiew ïa ki kyrtong na ka bynta ka ilekshon ka ban sa wan,” u la ong.
U Bah Ardent u la ong ba ka VPP ka la pyrshang ban ïakynduh ïa u Myntri Rangbah ka Jylla bunsien, hynrei ka jingpyrshang jong ki kam shym la urlong, ha kaba la shu aiti ïa ki jingthoh sha ki heh Sorkar.
“Kane ka pyni ïa ka jingbym shimkhia jong ka Sorkar ïa ka sur jong u paidbah,” u la kynnoh.
U la kynnoh ruh ba ka seng synshar ka la pynsaphriang ïa ki khubor bakla shaphang ka VPP, da kaba kam ba ka dei ka seng kaba kyrshan ïa ka niam Khristan. U Bah Ardent u la buh jingkylli ïa ka jingthmu jong ka seng synshar, ha kaba u la kylli hato ki donkam ne-em ïa ka jingkyrshan jong kiba bun ki Khristan ban jop ïa ka ilekshon.
“Ka VPP ka pyni ïa ka jingïatylli bad ka kyrpad ïa ki briew ban buh sharud ïa ka jingïapher niam bad ka imlang sahlang, hynrei ka seng synshar ka pyrshang ban pynpait pynpra ïa ki paidbah,” la bynrap shuh-shuh u Bah Ardent.
U Bah Ardent u la kyntu ruh ïa ki paidbah ba ki dei ban kyntait ïa ki bor ba pynpait pynpra bad ban nym thep vote ïa kito kiba buh hakhmat eh ïa ka bor ban ïa ka bha ka miat jong ki briew.
