Hyderabad, Nohprah:
Ki la don haduh 58 ngut ki khynnah skul kiba la kem pang ha ki ar tylli ki jingjia bapher bapher jong ka jingbam ha ki skul sorkar ha Hyderabad ha ka sngi Thohdieng.
Ki 16 ngut ki khynnah pule kynthei na Telangana Minority Residential School ha Baghlingampally ki la shah sumar ha katei ka jaka sumar sorkar kaba don ha King Koti hadien ba ki la ïathuh ba ki don ka jingshitom jong ka jingtlot, ka jingprie bad ka jingpang kpoh. Hadien la pyllait noh ïa ki.
U Superintendent jong ka Hospital u Dr Santosh Babu u la ïathuh ha ka TNIE, “Ki samla pule ki la shah sumar ha ka por mynstep ryngkat bad ka jingshitom jong ka jingprie bad tlot. Kine baroh 16 ngut ki la ïoh bor.”
Ki heh sorkar ki la ïathuh ba ki samla pule ki la sdang ban pyni ïa ki dak jingpang ha ka sngi Thohdieng, katto katne kynta hadien ba ki la bam ïa ka jab a khleh da ka doi na ka bynta ka jingbam miet jong ki ha ka sngi Palei. Katto katne ki khynnah pule ki la ïathuh ba ka doi ka don ka jingsma kaba pher.
Ha ka jingjia kaba ar, ki khynnah skul ha kawei ka skul sorkar ha Chandra Nayak Thanda ki la kem pang hadien ba ki la bam ïa ka jingbam sngi kaba la jia ha ka sngi Thohdieng.
U Director of School Education u Naveen Nicholas u la ïathuh ha kawei na ki lad phah khubor kumne, “Ka Hare Krishna Mission Foundation ka pynbiang ïa ki jingbam sngi sha ka skul lyngba ka Centralised kitchen. Ki la don kumba 30 ngut ki khynnah kiba la ïathuh ba ki la shitom kpoh shi kynta hadien ba ki la dep bam ïa ka jingbam kaba la ai sha ki.
Ïa kine la pynkit sha Area Hospital kaba don ha Kondapur, bad ïa ki katto katne la pynkit noh sha ka jaka ai jingsumar jong ki riew shimet bad ki la shah pyllait noh kham hadien.”
Ka jingpynbna jong ka sorkar hadien ka la buh ïa ka jingdon jong ki khynnah skul kiba shah ktah haduh 42 ngut.
U Nicholas u la ong ba ïa kajuh ka jingbam la pynpoi sha kiwei pat ki skul khlem jingujor, hynrei ka nongpynbiang ïa ka jingshakri kan sa peit bniah ïa kane ka kam.
