Nongstoiñ, Nohprah 14
U MLA ka Nongstoiñ Constituency, u Bah Gabriel Wahlang ha ryngkat ki nongïalam ka shnong Upper New Nongstoiñ lem bad ka jingïadonlang ruh ki doktor na ka ophis jong ka DM&HO, West Khasi Hills District ha ka Sngi Palei jong ka taïew ki la leit ban jurip ïa ka Maternity and Child Hospital (MCH) kaba 50 jingthiah kaba don ha Upper New Nongstoiñ.
Hadien ka jingleit jurip ïa katei ka MCH Hospital, na ka liang jong u MLA ha ryngkat ki nongïalam shnong ka Upper New Nongstoiñ ki la lap ba katei ka Hospital ka la long kaba la bit la biang ban sdang noh ban ai jingshakri ïa ki paidbah ka thaiñ West Khasi Hills District khamtam ïa ki longkmie kiba armet bad ïa ki khyllung khynnah.
Haba kren ha ki lad pathai khubor u Bah Gabriel Wahlang u la ong ba kaba sngewtynnad ka long ba ki tiar ruh ki la la wan poi lut da kiba thymmai bad kiba la bit la biang katkum ka jingdonkam jong kane ka juk kaba mynta bad kane ka MCH kan sdang treikam pura noh naduh ka 17 tarik u Nohprah, 2025 bad ïa ka jingplie paidbah pat yn sa plie kham hadien tad ynda ka la biang pura nadong-shadong.
U Bah Gabriel u la ong ruh ba ka jingrah noh ïa ki tiar na MCH Nongstoiñ sha Mawkyrwat ka khlem pynduhnong eiei ïa ka Nongstoiñ pynban ka la pynmyntoi shuh-shuh namar ba la rah ïa ki tiar kiba la kham rim, kiba la sarang.
U la ong ruh ba mynta ka Nongstoiñ ka la ïoh bujli da kiwei ki tiar kiba la kham ‘advance’ ban ïa kiba kham mynshuwa namar ki long kiba la bit la biang bha pura bad kiba dang thymmai.
