Nongpoh, Nohprah 14
Ki pulit ka Ri Bhoi District kila kyntait mardor ïa ka jingleh baheh kaba la kynnoh pyrshah ïa u Senior Superintendent of Police (SSP) ka Ri Bhoi, u Vivekanand Singh Rathore ha ka jingtalasi kali ha Nongpoh kaba la pynlong da ki pulit kumba la
pynmih ha ka lad pathai khubor Senapati Today na ka jylla Manipur, da kaba ong ba ka jingleh jong ki bor pulit ka long katkum ki kyndon aiñ ban pynthikna ïa ka jingshngaiñ na ka bynta ki paidbah nongleit nongwan ka dei kaba khlem nongrim bad kaba khlem ki jingshisha.
Kane ka jingpynshai ki pulit ka Ri Bhoi ka dei hadien ba ar tylli ki kali kiba la shah bat ha ki bor pulit, kila kynnoh ba ki la shah bat kumba lai kynta eiei ha thanad Nongpoh hadien ba ki la jam shakhmat ïa ka kali jong utei u heh pulit ka Ri Bhoi ha ka 11 tarik u bnai Nohprah, 2025 kaba la kam ba ar ngut shi kurim na ka jaidbynriew Bengali lem bad iwei i khun rit ki la shah bat khlem nongrim kat haduh bad kin duh ïa ka jingleit eroplein ka jong ki ryngkat bad kawei ka kali kaba don lai ngut ki briew, kiba la kynnoh ba la shu bat khlem nongrim bad leh donbor.
Haba jubab ïa katei ka jingkynnoh, ki pulit Ri Bhoi ki la ong ba ki lad pathai khubor ki dei ban da khmih bniah shwa hashwa ba kin pynmih ïa kino kino ki khubor kiba khlem da ïoh ïa ki jingshisha bad pynshai ba ïa kitei ki ar tylli ki kali, la bat hadien ba la lap ba ki ñiah khlem akor bad buh jingma ïa kiwei pat ki nongleit nongwan ha ka surokbah khamtam ha ka sor Nongpoh.
Katkum ka jingïoh khubor na ki pulit, la ïathuh ba kitei ki ar tylli ki kali ki la pynkheiñ ïa kyndon aiñ ñiah kali kaba kynthup ïa ka jingñiah sted, ka jingbym ailad ïa ka kali nongpang bad ïai pynsawa ïa ka horn kali kaba la buh jingma shikatdei ïa kiwei pat ki nongleit nongwan. U SSP ka Ri Bhoi hadien ba u la sakhi hi dalade ïa ka jingkren baheh kitei ki nongñiah kali nalor ba ki pynkheiñ aiñ, u la hukum ïa ki pulit pynïaid kali ba kin rah sha thanad bad leh ïa kaba donkam katkum ki kyndon aiñ bad ban daiñ kuna ruh da ka e-challan.
Utei u heh pulit ka Ri Bhoi u la pynshai ruh ba haba ki pulit ki ju talasi kali, ki ju lap bunsien ïa ki nongñiah kali kiba pynibor bad leh donbor bad ba na ka liang ki bor pulit hi, ki leh ïa la ka kamram ban ai jingshngaiñ na ka bynta ki paidbah bad ba kaei kaba ki leh ka dei katkum ki kyndon jong ka aiñ khlem da leh shilliang ïano ïano.
Haba kyntait mardor ïa ka jingleh baheh bad ka jingpyndonkam beaiñ ïa ka bor, ki pulit ka Ri Bhoi kila ong, ban pynthikna ïa ka jingshngaiñ jong ki nongleit nongwan ha ka surok, ym lah satia ban ïapeiñ, bad kaba ong ruh kine ki jingtalasi la pynlong khlem ka jingtieng jingsmiej bad ka jingshah shilliang ïano ïano lane khlem da kheiñ la ki dei ki heh ki hain, hynrei ba ka aiñ ka treikam kumjuh ïa baroh.
Kum ban shu kdew hangne, ka jingïai pynlong ki pulit Ri Bhoi hapoh ka jingïalam u SSP, Vivekanand Singh Rathore, ki jingjia tyngkhuh kali, ka jingñiah buiad bad kiwei kiwei pat ki rukom ñiah kali khlem akor kala hiar arsut bad na ka liang ki bor pulit ki la pynthikna ba kane ka jingtalasi kan dang ïaid shakhmat na ka bynta ka jingshngaiñ ki paidbah nongleit nongwan.
