Shillong, Nohprah 14
Kumba 186 tylli ki mukotduma kiba kot palat T. 1.66 klur la lah ban pynbeit noh ha ka National Lok Adalat kaba la pynlong da ka Meghalaya State Legal Services Authority (MSLSA) ha ryngkat ka
jingïatreilang bad ka National Legal Services Authority (NALSA) ha kylleng ka Jylla ha ka Sngi Saitjaiñ.
U Chief Justice, u Soumen Sen u la ïashim bynta ha ka National Lok Adalat ha Tura, West Garo Hills District, bad ïakren ruh bad ki nongsaid aiñ, bad kito kiba ïadon bynta ha ki mukotduma (Litigants).
U Justice H.S. Thangkhiew bad u Justice W. Diengdoh ki la ïashim bynta ha ka Lok Adalat ha Meghalaya High Court, District Court, East Khasi Hills District, Shillong bad ka District Council Court, KHADC.
Baroh ki don 653 tylli ki mukotduma kiba la shim, ba kynthup ïa 246 tylli ki mukotduma ‘Pre-Litigation’ bad 407 tylli ki mukotduma kiba sahteng. Na kine, 186 tylli ki mukotduma la lah ban pynbeit, kaba kynthup ïa ka pisa kaba T.1,66,26,250.82.
Ka National Lok Adalat ka la pynbiang ïa ka rynsan na bynta ki nongsaid aiñ bad kito kiba ïadon bynta ha ki mukotduma ban pynbeit ïa ki jingïakynad da ka jingïasuk, ban pynïoh ïa ka hok kaba kloi bad ban pynduna ïa ka jingkit kaba khia ha ki ïingbishar.
Ïa kane ka jingïalang la pynlong hapoh ka jingïalam jong u Chief Justice, Soumen Sen, uba dei ruh u Patron-in-Chief jong ka MSLSA bad ka jingpeit jong u Justice H.S. Thangkhiew, uba long u Executive Chairman, MSLSA bad u Justice W. Diengdoh, uba dei u Chairperson ka High Court Legal Services Committee.
