Shillong, Nohprah 14
Ka Seng Samla Sports and Cultural Club Mynni Mawbri,West Khasi Hills District ka la pynlong ïa ka jingïalang pynkup burom ïa ka Samla Kynshewlypa Mawlieh kaba na ka shnong Mynni Mawbri Nongstoiñ Syiemship, kaba la wanrah ïa ka nam ka burom ym tang ïa ka shnong ka thaw, ka dong ka thaiñ hynrei ïa ka Jylla hi baroh kawei.
Lah ban kdew hangne ba ka samla Kynshewlypa ka la leit ban ïa shim bynta ha ka 17th Junior National Micro Futsal Championship 2025 kaba la long ha Nongbah Delhi, kaba la pynïaid da ka Indian Futsal Federation.
Ka samla Kynshewlypa kaba la mihkhmat na ka School Joel Gatphoh Memorial Synod Hr. Sec. School Kynroh Nongkynjang, Nongstoin.
Ha katei ka jingleit ïakhun jong ka, ka la pynlong ïa ka skul kaba mihkhmat ïa ka Jylla Meghalaya ban ïoh ïa ka jingjop kum ka lahduh (champion) ha katei ka jingïakhun.
Ka Sports Club hapoh ka jingïalam u President bad Secretary, ki la ïoh ban pynkup burom ïa ka samla Kynshewlypa da ka jaiñ thohriaw stem bad ka momento ban sah jingkynmaw.
Balambokstar Dkhar, Secretary ka kynhun u la ai mynsiem bad kyntu kynpham ha ka jingsakhi bad don ryngkat lang jong ki kmie ki kpa bad kiba ha ïing ha sem ruh kumjuh.
Ha katei ka sngi la ïoh ruh ka jingkren ba lyngkot na ka samla Kynshewlypa Mawlieh bad na u kpa jong ka, uba la pynpaw ka jingsngew nguh sngew burom ïa ka Sports Club, kaba la ithuh kyrpang ïa ka khun jong ki lyngba kane ka jingpynkup burom.
