Jowai, Nohprah 14
Ka Krishi Vigyan Kendra (KVK), Jaiñtia Hills ka la pynlong ïa ka prokram ai jinghikai bad sam symbai phan sha ki 108 ngut ki nongrep ka distrik ha ka jingïalang ba long haka jaka treikam jong ka ophis ha ka 10 tarik Nohprah.
U Bah M. Kharbuli, Farm Manager ha ka jingkren pdiang, u la ïathuh ba ïa une u symbai phan la kyrshan da ka ICAR-IARI hapoh ka NEH Programme.
Ha katei ka sngi la donlang ka kongsan, ka Kong S. Kynjing District Horticulture Officer (DHO), West Jaiñtia Hills District kaba la ïaroh ïa ka jingtrei shitom jong ka KVK ha kaba kyrshan bor bah ïa ki nongrep bad kyntu ruh ïa ki paid nongrep ba kin shim kabu lyngba ki lad jingtip kiba la ïoh na kane ka prokram ai jinghikai bad pynshlur ruh ban shim ïa ka rukom rep phan kaba long katkum ka juk stad saian khnang ban ïoh ïa ka jingmih kaba kham bha.
Katba u Ma S. Lamare, Chairman ka shnong Wahiajer u la pynpaw ka jingsngewnguh ïa ka ophis jong ka KVK ha kaba kyrshan bad kyntiew ïa ki nongrep.
Ka Kong B. Kharbamon, Subject Matter Specialist (Horticulture) ka la ai jinghikai ïa ki nongrep halor ka jingpynmih ïa u phan, ki lad ïada na ki khñiang jingpang, ki dawai bad ka rukom buh bha ïa ki symbai phan.
Ka Kong Larika L. Challam, Senior Scientist & Head, KVK Jaiñtia Hills ka la kren ai mynsiem ïa ki nongrep ban pynneh pynsah ïa ki symbai na ka bynta ka aïom ban wan khnang ban pynduna ïa ka jingshaniah ha ki ïew kiba nabar.
