Shillong, Nohprah 14
U Bah Mayralborn Syiem MLA ka Nongpoh Constituency u la ïathuh ba ïa ka surok ba na Umshaken sha Umjari la dep ban mang (sanction) ban ïoh ïa ka surok rong ba bit ba biang.
U la ong ba kane ka surok ka dei kaba la sah kut la kham slem ha kaba ki nongleit nongwan ha ka thaiñ ki la ïakynduh jingeh shibun namar ka jingbym long bha ka surok khamtam lei ha ka por lyiur ba slap ka buh jingeh bha ïa ki paidbah ba leit ba wan na katei ka surok.
U la pyntip ba ïa katei ka surok, ka Sorkar ka la dep ban ‘sanction’ bad shen yn sa khot ‘tender’ noh na ka bynta ka jingpyntrei ïa katei ka surok.
Ka surok ba na Umshaken sha Umjari ka dei ka surok kaba pynïasoh ïa ka surok ban leit shaduh Assam bad ka jingïoh ïa katei ka surok kan pynsuk ïa ki nongleit nongwan ba ha ka thaiñ bad ba kan long ka jingmyntoi shibun ïa ki nongshong shnong bad ka la pynsuk ïa kiba leit ba wan haduh Assam.
“Nga la bthah ruh ïa ki briew jong ka tnad Public Work Department (PWD) ban kynthup lang ïa ki surok ba dang sah ïoh surok rong hapoh ka shnong Umshaken katba shah ki kyndon ka skhim PMGSY” la ong u Bah Mayralborn.
Shuh-shuh u la ong ba ïa ki bynta ba dang sah ba ymlah shuh ban pynrung hapoh ka skhim PMGSY un sa pynpeit khnang na ka State skhim.
