Bavaria, Nohprah:
Ki bor pyniaid jong ka Germany, ki la kem ia 5 ngut ki briew, kiba la suba ba ki dei ki lehnoh Islam, kiba thmu ban hiar thma ia kawei ka iew Khristmas, kaba don ha ka thaiñ shathie jong ka Bavaria, ong ki pulit bad ki nongmudui ha ka jingpynbna lang ba la pynmih ha kajuh ka por.
Namar la ong ba uwei u nong Islam u la tynrah ia kawei ka trok kaba la leit tur beit-beit sha kawei ka iew Khristmas ha ka phang pdeng jong ka nongbah Berlin ha u snem 2016. Ha u bnai Nohprah ba la dep, ha kaba katto- katne ngut ki briew ki la duh ei ia ka jingim na katei ka jingjia thombor ha Magdeburg.
La ong ba 3 ngut ki nong Morocco kiba ha ki rta 22, 28 bad 30 snem ka rta, uwei u nong Egypt uba 56 snem ka rta bad uwei u nong Syria uba 37 snem ka rta, ki la shah kem ha ka Sngi Thohdieng ha ki thaiñ khappud ka Suben jong ka Germany bad ka Austria.
Ki nongtohkit ki ngeit ba kitei ki briew ki thmu ban leit rung da ka kali sha kawei ka iew kaba bun briew ha ka thaiñ Dingolfing-Landau da ka jingthmu ban pyniap ne pynmynsaw katba lah ia kiba bun ki briew, ong ka kyrwoh bad bynrap ba ki bor pyniaid ki suba ba kane baroh ka dei ka jingthmu bad ka kam thombor jong ki lehnoh Islam.
