Shillong, Nohprah 14
Ka St. Joseph’s Church Mawkhar Parish ha ka sngi u Blei ka la plie pyrda ïa ka jingrakhe ka dap 75 snem (Platinum Jubilee) jong ka da kaba kyntiew ïa ka lama Jubilee da u Parish Priest u Fr. Leo Ïawbor.
Ha kane sngi ba plie ïa ka jingrakhe la donlang u Rev Fr. Bensar Kharsati,u Rev Fr Paulus Palamatam, ki Assistant Parish Priest ha ryngkat kiba shah khot sngewbha, baroh ki nongkitkam jong ka Parish Pastoral Council bad ki dkhot ka Jubilee Committee.
Ka St. Joseph’s Church Mawkhar Parish kan rakhe ïa ka Platinum Jubilee jong ka baroh shisnem kynthih kaba kan kut ha ka 17 tarik u Kyllalyngkot 2027.
Hadien ka jingplie ïa u snem Ka Jubili la pynbud da ka Mass Bakhuid da u Parish Priest u Rev Fr Leo Ïawbor. Haba sneng ba kyntu u Rev Fr Leo u la ong ba kane ka sngi bad ki sngi ban wan kin dei ki sngi jingainguh, u snem ban phaidien ïa ka por ba la sdang ïa ka Parish ha u snem 1951.
U la ong ba kum ki paid riewngeit kane ka pateng dei ban sngewnguh ïa ki Lyngdoh mynshwa haba plie ïa kane ka Parish. U la pynkynmaw ba u (L) Rev Fr Constantine Vendrame u la long u nong maitshrah ban thied ka jaka jong u Keran Pal uba dei u Kharbengali.
U la ong ba U Fr. Vendrame u la ïaishah ïa kiba bun ki jingpyrshah bad bun ki jingeh ba la mad da kato ka pateng kaba 75 snem ba mynshwa ha kaba ki la im ha ka jingngeit kaba shitrhem.
U la ïathuh ba nadien u Rev Fr Vendrame kiwei ruh ki Lyngdoh kiba bteng ïa ka kam shakri Blei ki la mad bun ki jingeh, ki la ïaishah, ki la lenlade bad aiti nadong shadong ban plie ïa kane ka Parish hajan jong ka Ïewduh.
U la kyntu ïa ki paid riewngeit ba ha une u snem Ka Jubili donkam ban pynkhlaiñ ïa ka jingngeit, ban sngewtrai ïa ka Balang.
U la pynpaw ka jingsngewnguh ïa baroh kiba la noh synñiang naduh ba sdang ïa kane ka Parish naba dei ka jingrhem ka jingngeit jong kiba ka Parish ka la nangkiew ha ka jingngeit.
