Chennai, Nohprah:
Ha ka jingthmu kaba nyngkong eh, ka tnat treikam jong ka Tamil Nadu ka la ai jinghikai ïa jan 30,000 ngut ki nongtrei ba ju shna ïing ha kylleng ka jylla ha kine ki ar bnai ba la dep bad ka thmu ban pyndap sa 50,000 ngut ki nongtrei ha ki ar bnai ban wan hapoh ka skhim kyntiew ïa ka jingtbit kaba kot sha ka T. 45 klur.
La pyntreikam lyngba ki Industrial Training Institutes (ITIs) ryngkat bad ka jingkyrshan jong ka tnat ai jinghikai, kane ka prokram kaba shi taïew ka ai jinghikai da ki kti ha ki kam kum ka jingpynkhih ïa ki nar, ka kam shna nar, ka kam ilektrik, ka jingpynpoi um, ka jingpynkhreh, ka jingpynbeit ïa ki rong, bad ki kam shna ïing ba kyllum. Ki nongshah hikai ki ïoh ïa ka stipend kaba T.800 shisngi ryngkat bad ka jingbam.
“Na ki 38 tylli ki distrik ha TN, 12 tylli ki distrik ki la dep ban pynurlong ïa ka thong jong ki hapoh ki ar bnai, kiba dang sah la khmih lynti ba kin pyndep ïa ka thong jong ki ha kine ki taïew ban wan”, la ong uwei u heh ka tnad treikam jong ka State Labour Department.
Ka prokram ka la ïarap ruh ban ithuh bad pynrung kyrteng ïa ki nongtrei shna ïing ki bym don jingpynbeit ha ka TN Construction Workers Welfare Board, namar ka jingpynrung kyrteng bad ka Board ka long kaba donkam ban ïoh ïa ka Recognition of Prior Learning (RPL) ba la ai hadien ka jingbishar bniah.
“La buh uwei u nonghikai na ka bynta kawei ka kynhun kaba don 25 ngut ki nongtrei.
Ka Tiruchy distrik ka la dep ban pyndep ïa ka thong jong ka da kaba ai jinghikai ïa kumba 1,600 ngut ki nongtrei”, la ong uwei u heh ophisar na ka tnad Labour ka Tiruchy. Katkum ka jingong ki heh sorkar, ka jingpynshisha RPL ka pynbha ïa ka jinglah ban ïoh kam bad ka lad kamai bad ka lah ruh ban ïarap ïa ki nongtrei ban ïoh kam shabar ri.
U T Arun GnaveL (32), uba la shah hikai ha Manikandam ITI ha u bnai Naiwieng, u la ong, “Ka sertiphiket ka la ïarap ïa ngi ban ïoh ïa ka jinghikai kaba kham bun na ki nongtrei kiba la tbit, bad la pynithuh ruh ïa ngi bad ki katto katne ki nongtei jingtei trai ri,” u la ong.
Ha ka jingleit jngoh jong kawei na ki lad pathai khubor ïa kawei na ki ITI ha Tiruchy, uwei u nongshong shnong uba dang shah hikai, uba kwah ban nym pynpaw kyrteng, u la ong ba kiba bun ki nongshah hikai ki dei kiba la trei lypa kum ki nongtrei shna ïing. “Ka jinghikai khamtam ka ïarap ïa ngi ban pynrung kyrteng ha ka Welfare Board. Hynrei hynriew sngi kam pat biang na ka bynta ka jinghikai Skill kaba biang”, u la ong.
U M Samad, uba dei u nongai kam shabar ri na Madurai, u la ong ba bunsien ki nongtrei bym pat tbit na TN ki leit sha ki ri Arab, Singapore bad Malaysia na ka bynta ki kam shna ïing.
“Kane ka Certification ka lah ban ïarap ïa ki, hynrei haduh mynta ngim pat ïoh ïa ki kandidet kiba don ïa ki Certificate RPL na ka bynta ki jaka trei shabar ri”, u la ong.
