Shillong, Nohprah 15
Ka Khasi Hills Autonomous District Council ka la pynmih ïa ka hukum ban bthah ïa ka Sohra Syiemship bad Mawlong Sirdarship ba ki dei ban peitngor haba ïadei ka kam khaïi pateng bad ka jingwan rung kyrthep ki mynder hapoh ka jingpeit jingkhmih jong ki.
Ha kane ka hukum jingpyntip ba ka KHADC ka la pynmih ha ka 2 tarik Nailur 2025 kawei na ki mat ba ka la bthah ïa ki Elaka ka dei kaba kdew ba dei ban pynkylla ïa ki kyrteng shnong nongwei sha ka kyrteng Khasi kaba kdew katkum ka KHAD (Administration of Elaka) Act 1991.
Ha ka 15 tarik Nohprah 2025 ka Hynñiewtrep National Youth Front, South East Sohra Circle ka la leit ban aiti ïa ki ‘signboard’ ha u Sirdar ka Elaka Mawlong bad pynkynmaw ba ka Hima ka dei ban leit sieh ïa kitei ki ‘signboard’ ha kitei ki Shnong ba la ai kyrteng nongwei.
U Bah Banjop Khongwir, nongaiktien ka HNYF u la ïathuh ba la dep ban aiti ïa ki ‘signboard’ sha u Sirdar ka Elaka Mawlong na ka bynta ban leit sieh ha ki shnong kiba la ai kyrteng nongwei ha katei ka thaiñ.
U la kdew ba ki shnong kiba dei ban leit pynkylla kyrteng ki kynthup ïa ka Kuti, ïa kaba ha ki por ba mynshuwa la ju khot Mawbyrsiew, ka Rangamati ba ha ki por ba mynshuwa ki khot ka Dong Dewsaw.
“Ka jaitbynriew ka im, ka dei na ka jingdon ka khyndew ka shyiap bad ka long ka jinglynga mynsiem lada kine ki kyrteng shnong ba la jer ha ka kyntien nongwei ki sah-sah ha kajuh ka kyrteng ha ka ktien nongwei” la ong u Bah Banjop bad ruh u la bynrap ba ka ophis u Sirdar bad ka KHADC ka la don ïa ka hukum (notification) ba ka la dep ban pdiang na ka jingïakren ha ka jingïalang kaba la long ha Majai ha ka 28 tarik u Nailar 2025 hapdeng ka KHADC, ki Sirdar Elaka bad ki seng bhalang bapher-bapher.
Haba ïoh ban ïakren ïa u Sirdar ka Elaka Mawlong u Bah S.K. Laloo u la pynpaw ïa ka jingsngewkmen ba ka HNYF ka la shimkhia ïa kane ka kam ba ai ka jingïatreilang bad ka Elaka na ka bynta ka jingmyntoi ki paidbah bad pynpaw ba ka Elaka kan sa shong jingïalang ban pynbeit ïa kane ka kam bad kyrmen ba ha u snem ban wan ka Elaka kan sa pyndep ïa ka bynta ban sieh ïa ki ‘signboard’ ha kitei ki shnong.
