Shillong, Nohprah 15
Ka Khasi Jaiñtia Deficit School Teacher’s Association (KJDSTA) ha ka 15 tarik u Nohprah 2025, ka la pynlong ïa ka jingïalang paidbah ha madan Malki, ban dawa na ka Sorkar ban pynkiew noh ïa ka Dearness Allowance (DA) na ka 43% sha ka 51% na ka bynta ki nonghikai deficit ha ka Jylla.
Ha kane ka jingïalang ba la long ha Madan Malki la sakhi ïa ka jingwan da ki spah ngut ki nonghikai ban shim bynta lang. U Bah Boswell Pala, President u la ong ba ki nonghikai deficit ki la dep ban pynsngew sha ka Sorkar Jylla halor kane ka mat, hynrei haduh mynta ka DA ba ki ïoh ka dang neh hi kumjuh, kata 43%. “Nangta ngi la dawa na ka Sorkar ba kan pyllait noh ïa ka ‘arrear’ kaba 43% sha ka 51%,” u la ong.
“Ngi la dep ban phah ruh ka shithi sha u Myntri Rangbah, u Conrad K Sangma ban ïa kynduh bad u, hynrei haduh mynta ngi khlem ïoh ïa ka jubab,” la ong u Bah Boswell Pala.
U la ong ba ka DA kadei ka hok jong ki nonghikai deficit, da kaba ong ba ka Sorkar ka la lehbeiñ ïa ki nonghikai deficit bad kane ka jinglehbeiñ ka Sorkar ka long ruh kumba ki lehbeiñ ïa ki khynnah skul.
“Ngi dawa jur ïa ka Sorkar ba kan leh eiei bad rai mardor ban pynkiew ïa ka DA jong ki nonghikai deficit ka ban long katjuh bad ki nongtrei Sorkar bad ban pyllait noh ïa ki ‘arrear’ jong ka DA ba pynkiew ha ki snem ba la dep,” la ong u Bah Boswell Pala.Kumta u la kyntu ïa ka Sorkar ba kam dei ban ïai bteng ban khynñiat ïa ki sha surok, namar lada ka tuh ïa ka hok jong ki, ki ruh kin ïaleh kylliang ban pynduh ïa kane ka jingleh beiñ haduh ba ka jingleh beiñ kan ym don shuh ïa ki.
“Ka Sorkar ba mynshwa ka kyrshan ïa ki nonghikai hynrei mynta pat ka Sorkar ka leh beiñ bad tuh noh ïa ka hok ki nonghikai deficit,” la bynrap shuh-shuh u Bah Boswell Pala.
Ki nonghikai deficit ki la buh por ïa ka Sorkar ba kan pyndep ïa kane ka jingdawa jong ki ha shwa ka 15 tarik u Kyllalyngkot (January) 2026, bad lada kam sngap ïa ka jingdawa jong ki, kin sa pynlong da ka jingïakhih paidbah.
