Shillong, Nohprah 15
Ka Khasi Student’s Union (KSU) East Jaiñtia Hills ha ka 15 tarik u Nohprah 2025, ka la leit ban ïakynduh ïa u Member Secretary ka MSPCB, u Dr. C.H Chyrmang ban pan jingshai ha kaba ïadei bad ka jingthmu pynïaid beit ïa ka jingïalang paidbah ne ka ‘Public Hearing’ ka ban sa pynlong ha shnong Daistong ha ka 19 tarik Nohprah 2025.
Kane ka jingthmu pynlong ïa ka ‘Public Hearing’ ka long na ka bynta ban buh ïa ka karkhana Shree Cement Limited ha katei ka shnong kaba hap hapoh ka Elaka Nongkhlieh.
Haba kren sha ki lad pathai khubor, u Bah K.S Suchiang, General Secre-tary KSU, East Jaiñtia Hills u la pynpaw ka jinglyngngoh, ba kumno la ïoh ban die ïa katei ka jaka sha u bar jylla.
“Kane ka dei ka jingpynkheiñ ïa ka Land Transfer Act-1972. Lada ka Sorkar ka ai lad ïa kum kine ki jingleh benami, dei ka Sorkar hi kaba pynkheiñ nyngkong ïa ka aiñ kaba ka la wanrah,” u la ong.
U Bah K.S Suchiang u la ong ruh ba kane ka pawshai ba dei ka Sorkar hi kaba la pynkheiñ nyngkong ïa ka aiñ ba ka la buh halor ka jingai jaka sha u bar jylla.
Ha ka jingïakynduh bad u Member Secretary ka MSPCB u Bah KS.Suchiang u la pyntip ban na ka liang jong u, u la ong ba um lah ban leh eiei halor kane ka kam, da kaba aidaw ba kadei ka jingleh na ka SIA ym na ka MSPCB.
Kumta u la buh jingkylli ruh ba hato ka SIA ka donbor ban ïa ka Land Transfer Act bad lada ka donbor balei la shna ïa kane ka aiñ?.
“Ngin nym pat ïakren halor ka jingshah ktah ïa ki nongrep hynrei mynta ngin ïakren shuwa halor ka jingïoh thied jaka ki bar jylla ïa ki jaka jong ki paradoh parasnam jong ngi. Hato kane kam ktah ïa ka Jylla baroh kawei? bad lada ka Sorkar ka ailad ïa kum kine ki jingleh benami, ngi sngewthuh ba dei hi ka Sorkar kaba pynkheiñ ïa ka aiñ,” la ong u Bah K.S.Suchiang.
U la ong “Mynta ka paw shai ba dei ka Sorkar kaba pynkheiñ nyngkong ïa ka aiñ, kaba ong “Ym bit ïa u trai jylla ban die ïa ka khyndew ka shyiap sha ki bar jylla”.
U la ong ba na ka liang ka KSU kan sa ïa shong pyrkhat ban ïa mir jingmut, ba kumno kin leh ha kaba ïadei bad kane ka kam, namar kane kam ktah tang ïa ka East Jaiñtia Hills Distrist hynrei ka ktah lut ïa ka Jylla hi baroh kawei.
Haba kylli u la ong “Lada ka ‘Public Hearing’ kan ïaid beit shakhmat, ka KSU kan sa shong jingïalang kyrkieh bad kan sa shim ïa ka rai kaei ba kin leh”.
