Syria, Nohprah:
Ka tnat kam pohïing jong ka Syria, ka la ong ha ka Sngi U Blei ba u nongthombor uba la pynïap ïa lai ngut ki nong America ha ka thaiñ Palmyra pdeng ha ka sngi ba la dep, u dei u dkhot jong ki bor pahara uba la thmu ban shah beh kam namar ka jingleh pynkheiñ aiñ bad ki jingleh palat jong u kiba long pyrshah ia ka aiñ.
Arngut ki shipai jong ka US bad uwei u riew paidbah, ki la ïap ha kaei kaba ka sorkar Syria, ka la kdew kum ka “jingthombor jong ki lehnoh” ha ka Sngi Saitjaiñ, katba ka United States pat, ka la kynnoh ba dei ka kam thombor jong ka kynhun lehnoh Islamic State (IS).
Ki bor pyniaid jong ka Syria “ki la rai ban beh kam ïa u” na ka tnat pahara jongka, shuwa ka jingshah thombor namar ba u don ïa ki jingthmu ba shyrkhei jong ki kam lehnoh Islam bad ki la thmu ban leh ïa kane ha ka Sngi U Blei, ong u Noureddine al-Baba, u nongaiktien jong ka tnat kam pohïing jong ka ri.
U heh pahara jong ka Syria u la iathuh ha ki lad pathai khubor ha ka Sngi U Blei ba la kem bad wanrah 11 ngut ki dkhot jong ki bor pahara ba kyllum ban kylli jingkylli hadien jong katei ka kam thombor.
Utei u heh sorkar, uba la kren khlem da kwah ban pynpaw kyrteng, u la ong ba utei u nongrah suloi u dei u jong ki bor pahara “la palat 10 bnai bad u la shah pynkynriah ha ki katto katne ki nongbah shwa ban pynkynriah noh ia u sha Palmyra”.
Ka Palmyra, kaba don ki jingjot barim ba la buh ha ka thup jong ka UNESCO, la synshar da ka IS ha ka por ba ka dang jur bha ka jingpynheh ia ka jaka jong ka ha Syria.
Katei ka jingjia, ka dei kaba nyngkong eh kaba la iathuh, naduh ba ki shipai ba la ialam da ki Islamist, ki la pynkhyllem ia u nongsynshar ba la slem jong ka Syria, u Bashar al-Assad, ha u bnai December jong u snem ba ladep bad pynim biang ia ka jingiadei jong katei ka ri bad ka America.
U President ka America, u Donald Trump, u la byrngem ban leh ia ka jingpynshitom bein kaba shyrkhei bha, hadien katei ka jingshah thombor ha ka Sngi saitjaiñ.
U heh jong ka tnad iada ri jong ka Syria, u la ong ha ki nongthoh khubor khlem da kwah ban pynpaw kyrteng, ba shwa katei ka jinghiar thma, ki shipai jong ka US ki la “poi lyngba ka khyndew na ka liang jong ka ktem shipai Al-Tanf” ha ka thain shatei lam mih ngi jong ka Syria, hajan khappud bad ka Jordan.
“Ka kynhun ba ïatreilang jong ka Syria bad America, ka la leit jngoh nyngkong ïa ka nongbah Palmyra, nangta ka la leit sha ka ktem liengsuiñ T-4 shwa ban leit phai biang sha kawei ka ktem ha Palmyra,” la bynrap shuh shuh ka tyllong khubor.
Uwei u heh shipai jong ka Syria uba la pan ban nym pynpaw kyrteng u la ong ha ka sngi saitjaiñ ba kitei ki kuli ki la siat “ha ka por ba ki don ki ophisar jong ka Syria bad America” ha kawei ka ktem jong ka Syria ha Palmyra.
Hynrei, uwei u heh jong ka Pentagon uba kren khlem da kwah ban pynpaw kyrteng u la ïathuh ruh ha ki nongthoh khubor ba katei ka jingshah thombor “ka la jia ha ka jaka ba u president jong ka Syria um don jingsynshar”.
Halor katei ka jinghiar thma, ki bor synshar ki la pynlong ïa ka jingkhynra pyrshah ïa ki cell jong ka kynhun IS ha kylleng ka jylla Homs, ha kaba ka Palmyra ka don, la ong ka telebishon jong ka Syria ha ka Sngi U Blei.
